Куыстагур æрбацыд 200 адæймагæй фылдæр
Цæгат Ирыстоны паддзахадон университеты уыд педагогон куысты бынæтты армукъа. Куыстагур æрбацыд 200 адæймагæй фылдæр. Куысты бынæттæ та уыдысты 170-йы бæрц. Армукъайы архайдтой Дзæуджыхъæуы æмæ республикæйы æппæт районты ахуыргæнæндæттæ. Скъолаты минæвæрттæ радзырдтой куысты фадæтты, мызды æмæ социалон гарантиты тыххæй. Æппæтæй фылдæр куысты бынæттæ баст уыдысты математикæйы, уырыссаг æвзаг æмæ литературæйы, стæй æрдзон-наукон циклы предметты ахуыргæнджытимæ. Хъæуынц ма райдайæн кълæсты, уæлæмхасæн ахуырады, информатикæйы педагогтæ æмæ психологтæ. Мадзалы кадджын уавæры архайджыты раз раныхас кодтой, дæсныйады æнтыстдзинæдтæ кæй къухы бафтыд, уыцы педагогтæ. Радзырдтой, сæ куысты тыххæй, студентты фæрстытæн дзуæппытæ радтой. Университеты ректор Огъуаты Алан куыд загъта, афтæмæй ахуыргæнæг бæстæйы райрæзты ахсджиаг бынат ахсы.
