Ацы аз сæ цæхæрадоны æрзадысты джитъритæ, настæ, неситæ, кæрдотæ æмæ æндæр халсартæ æмæ дыргътæ
Социалон приюты цæрджытæ æмбырд кæнынц тыллæг. Ацы аз сæ цæхæрадоны æрзадысты джитъритæ, настæ, неситæ, кæрдотæ æмæ æндæр халсартæ æмæ дыргътæ. Цы æрзайын кæнынц, уымæй уайтагъд спайда кæнынц. Ам чи цæры, уыцы адæм 25 азы дæргъы исынц хъæугæ æххуыс. Чидæртæ ма скодтой бинонтæ дæр. Социалон приюты ма ис цæрджыты адаптацийы цымыдисаг хуыз дæр – зоотерапия. Бæлвырддæр радзурдзæн Хъайтмазты Дзерассæ.
Алы бон дæр ацы кусæнуаты райдайы иухуызон. «Социалон приюты» кусджытæ æмæ цæрджытæ æмбырд кæнынц тыллæг. Владимир Парсаданов ам цæры 5 азы. Нæлгоймаг ссардта æрмæст хæдзар нæ, фæлæ ма уарзон хъуыддаг æмæ бинойнаджы дæр. Цæхæрадонмæ зилынц иумæ. Ис сын бæлвырд фæтк. Сыстынц райсомы 5 сахатыл. Уый фæстæ хъæуы хуымтæ донæй бафсадын æмæ тыллæг сæмбырд кæнын .
Джитъритæ, нас, неси, кæрдо – хи къухтæй цы халсартыл æмæ дыргътыл бакуысай, уыдон хæрзаддæр сты, зæгъынц цæрджытæ. Цæхæрадон скæнын æмæ афтæмæй адæмы цард фæцымыдисагдæр кæнын уыд кусæнуаты директоры хъуыды.
Гæххæттытæ сног кæнын, хиуæтты ссарын, куыстмæ бакæнын. Ныртæккæ Дзæуджыхъæуы социалон приюты хæдзар æмæ аудындзинад ссардтой 35 адæймаджы онг. Кусæнуаты специалисттæ ныр 25 азы æххуыс кæнынц адæмæн – ныхасæй æмæ хъуыддагæй. Ам æххуыс кæнынц æрмæст адæмæн нæ, фæлæ цæрæгойтæн дæр. Цæрджытимæ ам дыккаг хæдзар ссардтой 3 гæдыйы æмæ куыдзы.
Зоотерапия дæр у дзæбæх кæныны хуыз. Специалисттæ куыд зæгъынц, афтæмæй цæрæгойтæ æххуыс кæнынц социализацийы, исынц стресс. Иунæг адæмæн свæййынц æцæг хæлæрттæ.
Приюты цæрджытæ иу ран нæ бадынц. Вæййынц музейты, саразынц ерыстæ шашкæтæй, нардæтæй æмæ дартсæй. Иумæ бæрæг кæнынц бæрæгбæттæ. Ам адæм цæрынц иу бинонтау.
