Автор æй сбаста, Уæрæсе республикæйы хæдбардзинад кæй банымадта, уыцы цауы 17 азы кадæн
Цхинвалы байгом Хуссар Ирыстоны сгуыхт нывгæнæг Каджаты Вадимы куыстыты равдыст. Автор æй сбаста, Уæрæсе республикæйы хæдбардзинад кæй банымадта, уыцы цауы 17 азы кадæн. Экспозицимæ хаст æрцыдысты, Вадим Уæрæсейы аивæдты академийы студенттимæ кæй скодта, ахæм иумæйаг куыстытæ. Се ппæт дæр дзурæг сты Ирыстоныл, йæ историйыл æмæ нырыккон цардыл. Каджаты Вадим райгуырд æмæ схъомыл Цхинвалы. У зындгонд педагог Кæсойты Лаврентийы хъомылгæнинаг. Авторæн бантыст патриотизмы æнкъарæнтæ бахъахъхъæнын, æмæ ма йæ бындурыл йе сфæлдыстад апарахат кæнын. Кавказы æрдз, йе гæрон арæнтæ, поэтикон ландшафт, ирд ахорæнтæ бынат ссардтой мастеры пейзажты. Каджаты Вадимы куыстытæ ныртæккæ фенæн ис хи коллекциты дунейы алы бæстæты.
