Байгом Дзæуджыхъæуы Хъæбæлоты Билары уынджы
Фыццаг дзæнгæрæг азæлыд ног скъолайы 650 ахуырдзауæн. Байгом Дзæуджыхъæуы Хъæбæлоты Билары уынджы. Ахуыргæнæндон арæзт æрцыд, национ проект «Ахуырад» æххæст кæнгæйæ. Микрорайон «Ног горæт»-ы уый у фыццаг скъола, уымæ гæсгæ йæ байгом кæнынмæ бынæттон цæрджытæ зæрдиагæй æнхъæлмæ кастысты. Рæзгæ фæлтæрæн, сæ ныййарджытæн æмæ ахуыргæнджытæн раарфæ кæнынмæ æрбацыдысты республикæйы ахуырады æмæ наукæйы министр Алыбекты Эллæ, Дзæуджыхъæуы мэр Милдзыхты Вячеслав, стæй Цæгат Ирыстоны сæйраг федералон инспектор Сергей Гончаров. Ног скъолайы фыццæгæмкъласонты нымæц у 150 сывæллоны. Нырма уал кæнынц фыццаг къахдзæфтæ скъолайы царды. Фæлæ фидарæй зæгъæн ис уый, æмæ сæм разæй æнхъæлмæ кæсы ахуырады даргъ æмæ уæрæх фæндаг. Кадджын линейкæйы фæстæ бæрнон кусджытæ æркастысты ног кабинеттæм æмæ федтой скъолайы цæттæдзинад ног ахуыры азмæ. Библиотекæ, фæллойы кабинеттæ, дыууæ спортивон залы, хъазæн фæз. Ахуыргæнæндоны стыр æргом аздæхтой æрыгон педагогтæм. Алкæцыдæр сæ цæттæ у сывæллæттимæ зæрдиагæй кусынмæ, – загъта директор Людмила Башарина.
