Цы федтой, уымæй разыйæ нæ баззадысты
Дзæуджыхъæуы муниципалон сконды минæвæртты депутаттæ сбæрæг кодтой сывæллæтты рæвдауæндæтты уавæр. Цы федтой, уымæй разыйæ нæ баззадысты. Бæстыхæйттæн сæ фылдæр арæзт æрцыдысты ивгъуыд æнусы 60-æм азтæ. Уæдæй нырмæ иу хатт дæр бындурон цалцæггонд нæма æрцыдысты. Зæронд коммуникацитæ, базилинаг хъармгæнæн æмæ канализацион системæтæ. Бæлвырддæр радзурдзæн Чехойты Фатимæ.
Хъармгæнæн системæ, электрон тыхы æмæ инженерон хызтæ – Дзæуджыхъæуы 63-æм рæвдауæндоны лыггæнинаг фарстатæ бирæ. Уыдонæй иу сси æнæнхъæлæджы цауы аххосаг. Къæридоры электрон тыхы хæтæлтæ кæм баиу вæййынц, уыцы бынатæй фæздæг цæуын райдыдта. Кусджыты цырддзинады руаджы фыдбылыз не *рцыд, фæлæ аххосаг нæ аиуварс кодтой. Рæвдауæндоны сæргълæууæджы ныхæстæм гæсгæ, фæззыгон-зымæгон рæстæг тыхсын кæны уымæлад, агъуыстытæ æмбæлгæ уагыл хъармæй æххæст нæ вæййынц. Бæстыхай 1969-æм азæй нырмæ у базилинаг. Бындурон цалцæджы бæсты – хи къухтæй конд уæлæнгай куыстытæ.
Кусæг къорд арæзт æрцыд депутаттæй æмæ Дзæуджыхъæуы администрацийы ахуырады, стæй арæзтады управлениты минæвæрттæй. Рæвдауæндæттæ-иу раздæр дæр бабæрæг кодтой. Ныр уыдысты уыдонæй авды. Нысан кодтой 59-æм рæвдауæны уавæртæ дæр сбæрæг кæнын. Хайгай йæ сцалцæг кодтой, фæлæ санитарон агъуыстытæм нæ базылдысты.
68-æмы лыггæнинаг фарстатæ бирæ. Вентиляцийы, канализацийы, хъармдæттæг æмæ электрон тыхы системæтæ… Бæстыхай лæггад кæны æнусы *рдæг, домы бындурон цалцæг. Уый сбæлвырд кодта кусæг къорд. 106 милуан сомы дихгонд æрцыд горæты бюджетæй. Уыцы фæрæзтæй 2 азмæ хъуамæ сцалцæг кæной 27 рæвдауæндоны. Куыстытæ цæудзысты 3 фæлтæрæй. Фыццаджыдæр райдайдзысты, цалцæг дарддæр аргъæвæн цы рæвдауæндæтты нал ис, уым. Ахæмтæ сты 7.
Кусæг къорд арæзт æрцыд Дзæуджыхъæуы муниципалон сконды минæвæртты æмбырды сæрдар Таболты Сергейы хъæппæрисæй. Йæ сæйраг хæс у цалцæггæнæн куыстыты хæрзхъæддзинадмæ цæстдарын. Рæвдауæндæтты уавæртæм æркаст цæудзæн дарддæр дæр, зæгъынц депутаттæ.
