Йæ куыстытæ хицæн кæнынц арф хъуыдыкæнынадæй æмæ сындæгдзинадæй
Нарты кадджытæ, Хетæгкаты Къостайы поэзи, традицион национ мотивтæ. Хуссар Ирыстоны адæмон нывгæнæг, Хетæгкаты Къостайы номыл паддзахадон премийы лауреат Æлборты Ирбеджы куыстыты юбилейон равдыст байгом нæ республикæйы Национ наукон библиотекæйы. Баст у нывгæнæджы 80 азы бонимæ. Æлборты Ирбеджы æрмдзæф бæрæг дары аивады. Йæ куыстытæ хицæн кæнынц арф хъуыдыкæнынадæй æмæ сындæгдзинадæй. Уыцы иу куыстмæ нывгæнæг йе ргом здахы афæдзæй-афæдзмæ. Бафтауы йæм ног лыстæгдзинæдтæ, хатгай та йæ бындуронæй аивы. Ахæм егъау нывтæ, куыд «Ардбахæрд», «Æвзонгдзинад», «Зæронд мыд», «Уæлахиздзаутæ» систы авторы сфæлдыстады ног къæпхæн. Чингуыты графикæ та сси Æлборты Ирбеджы ног цымыдисаг æрмдæсныйады хуыз. Йæ иллюстрацитæ Хетæгкаты Къостайы уацмыстæм бауарзтой чиныгкæсджытæ. Нывгæнæг арæзта уникалон сурæттæ «Нарты кадджыты Энциклопедимæ». Рухс федта æртæ томæй, Цыбырты Людвигы редакцимæ гæсгæ. Скульптурæ та у мастеры курдиат æмæ аивадмæ уарзондзинады æвдисæн. Равдыст саразыныл бакуыстой Национ наукон библиотекæ, стæй Цæгат æмæ Хуссар Ирыстоны нывгæнджыты Цæдистæ. Бахастой йæм Æлборты Ирбеджы 47 куысты. Экспозици фенæн уыдзæн ацы мæйы кæронмæ.
