Скъола бабæрæг кодта республикæйы сæргълæууæг Сергей Меняйло
Аивæдты лицейы байгом креативон индустрияты скъола. 2 азы дæргъы 80 сывæллоны республикæйы алы районтæй ахуыр кæндзысты къамтæ æмæ видео исын, стæй зонгæ кæндзысты электрон музыкæйы, дизайны æмæ режиссурæйы сусæгдзинæдтимæ. Скъола бабæрæг кодта республикæйы сæргълæууæг Сергей Меняйло. Бæлвырддæр радзурдзæн Чехойты Фатимæ.
Студийы ахуырдзауты курдиатмæ гæсгæ Сергей Меняйло хъуыды кæны фидæны мелоди. Цалдæр аккорды – ног историйы райдианы æвдисæн. Скъоладзаутæ æрхъуыды кæнынц синглтæ, сæ хъæлæстæй сдзурынц мультипликацион кинонывты хъайтартæ. Ам æрмæст музыкæ нæ райгуыры. Скъолайы хъомыл кæны æнкъарын æмæ фæлдисын чи зоны, ахæм ног фæлтæр. Республикæйы Сæргълæууæджы ныхæстæм гæсгæ, сфæлдыстадон тыгъдады фæзынд у рæстæджы домæн.
Креативон индустрияты скъола байгом республикæйы аивæдты лицейы. Бæстыхай æрцыд бындурон цалцæг. Нырыккон студитæ, компьютертæ, хъæлæсфыссæн фæрæзтæ – скъола ифтонг у хъæугæ техникæйæ. Ахуыр дзы кæнынц 80 сывæллоны республикæйы алы районтæй. Уыдон 4 къабазмæ гæсгæ зонындзинæдтæ исдзысты 2 азы. Дзиццойты Софи – скъолайы фыццаг ахуыргæнинæгтæй иу. Æртæ азы дæргъы йын цымыдисаг уыд музыкæйæ архайын, ныр та йæхи фæлвары дизайны дæсныйады.
Къамтæ æмæ видео исын, дизайн, электрон музыкæ, режиссурæ. Скъолайы директор Уаниты Зинаидæйы ныхæстæм гæсгæ, ахуырады къабæзтæ ног азæй фæстæмæ фæфылдæр уыдзысты. Ивд æрцæудзысты сывæллæттæн скъоламæ бацæуыны домæнтæ дæр.
Скъола байгом федералон проект «Придумано в России» æххæстгæнгæйæ. Ног аз ма фæзындзæн иу ахæм сфæлдыстадон тыгъдад, ныр та – Тауаситы Сослæнбеджы номыл аивадон скъолайы.
