Кадджын мадзал арæзт æрцыд, курдиатджын кинематографист цы хæдзары царди, уый кæрты
Фыссæг, поэт æмæ режиссер Гуыдиаты Гермæнæн Дзæуджыхъæуы байгом кодтой номарæн фæйнæг. Кадджын мадзал арæзт æрцыд, курдиатджын кинематографист цы хæдзары царди, уый кæрты. Æрбахуыдтой йæм Цæгат Ирыстоны культурæйы министрады, Дзæуджыхъæуы минæвæртты сконды, мыггаджы минæвæртты æмæ республикæйы киноаивады архайджыты. Гуыдиаты Гермæн каст фæци кинойы Æппæтуæрæсеон паддзахадон институты Роман Кармены æрмадз. Республикæйы телеуынынады æмæ Цæгат Кавказы кинохроникæйы студиты цы куыстытæ систа, уыдон систы ирыстойнаг кинодокументалистикæйы классикæ. Уыд ахæм кинонывты сценариты автор æмæ режиссер, куыд: “Хетæгкаты Къоста”, “Еще шаг назад”, “Портрет”, “Поиск”… Уыимæ ма у бирæ поэтикон æмбырдгæндты автор – “Горы в Коби”, “Бездна”, “Клятва Вершин”.
