Премьерæ уыд Хæххон паддзахадон аграрон университеты культурæйы галуаны
Фæсивæдон театр «Амыран» аивадуарзджыты размæ рахаста Николай Гоголы пьесæмæ гæсгæ æвæрд спектакль «Ускурæнтæ». Премьерæ уыд Хæххон паддзахадон аграрон университеты культурæйы галуаны. Классикы зындгонд комеди уыд ирон æвзагыл, ратæлмац æй кодта Лазарты Таймураз. Режиссер-æвæрæг та республикæйы аивæдты сгуыхт архайæг Цæгæраты Руслан. Ус ракурын чи сфæнд кодта, ахæм бæрнон кусæджы истори фæцыд театрдзауты – Цæгат Ирыстоны ахуыргæнæндæтты студентты æмæ скъоладзауты зæрдæмæ. Спектаклы ис 2 акты. Театры актертæ ма йæ æвдыстой 18 азы размæ. Ныр та йæ аивадуарзджыты размæ рахастой ног хуызы. Спектакль æвæрд у сфæлдыстадон проект «Æрыгондзинад æнæ арæнтæй»-мæ гæсгæ. Æххæст æй кæны Уæрæсейы фольклорон цæдисы регионалон хайад бæстæйы культурæйы министрады æххуысæй.
