Республикæйы ахуыргæнæндæттæн сæ балхæдтой инвестортæ – агропромышленнон комплексы къабазы чи архайы, уыцы куыстуæттæ
Цæгат Ирыстоны 7 агротехнологон къласы райстой ног ифтонггæрзтæ. Республикæйы ахуыргæнæндæттæн сæ балхæдтой инвестортæ – агропромышленнон комплексы къабазы чи архайы, уыцы куыстуæттæ. Хæрдзты иумæйаг бæрц уыд 33 милуан сомы онг. Ифтонггæрзты номхыгъд у стыр. Хъæууон хæдзарады алы къабæзтæм гæсгæ ахуыртæ кæнынæн ис алцыдæр – мыдыбындзытæ дарынæй æхсыры продукци цæттæ кæныны онг. Техникæ лæвæрд æрцыд Хæххон паддзахадон аграрон университеты æмархайдæй. Уæлдæр ахуыргæнæндоны ахуыргæнджытæ кусдзысты агрокъласты ахуырдзаутимæ ног бæрзондтехнологон ифтонггæрзтыл. Ацы хъуыддаг æххæст кæнын уыдзæн скъолаты ахуыргæнджыты бон дæр, уымæн æмæ федералон проект «Кадры в АПК»-мæ гæсгæ алчидæр ацыд ахуырад Тимирязевы номыл Мæскуыйаг хъæууонхæдзарадон академийы бындурыл. Иннæ аз ма Цæгат Ирыстоны фæнд кæнынц ифтонггæрзтæй баххæст кæнын ноджыдæр 7 къласы.
Фарныхъæуы скъола фыццæгты æмрæнхъ райста хъæугæ ифтонггæрзтæ. Æдæппæтæй дзы ис 2 агротехнологон къласы. Ахуыр дзы кæны 26 лæппу æмæ чызджы. Æдæппæтæй республикæйы ис 26 агрокъласы 18 скъолайы. Сæрмагонд ахуырад исынц 490 сывæллоны онг. Федералон проект «Кадры в АПК» æххæстгонд цæуы нацпроект «Технологическое обеспечение продовольственной безопасности»-мæ гæсгæ.
