Ацы хъуыддаг æххæстгонд æрцыд национ проект «Фæсивæд æмæ сывæллæттæ»-м гæсгæ
Кълæстæ, хуызтæм æмæ предметтæм гæсгæ хицæнгонд зонæтæ, зондджын хъусынгæнæн системæ, тагъд интернет, æмæ ма суанг мысан æхсыны къордæн хи гæрзифтонг агъуыст дæр. Дзæуджыхъæуы 8-æм æмæ 25-æм скъолаты кæронмæ фæхæццæ кæны бындурон цалцæг. Ацы хъуыддаг æххæстгонд æрцыд национ проект «Фæсивæд æмæ сывæллæттæ»-м гæсгæ. Бæлвырддæр радзурдзæн Хъайтмазты Дзерассæ.
Дзæуджыхъæуы 8-æм скъола бындурон цалцæгмæ æнхъæлмæ каст 50 азæй фылдæр. Куыстытæ райдыдтой апрелы, абон та ахуыргæнæндоны фæвæййынц цæттæгæнæн мадзæлттæ ахуырадон процесс æххæстæй райдайынмæ. Уæвгæ, уый цалцæджы рæстæгмæ дæр не рлæууыд. Боны фыццаг хайы скъолайы уыдысты сывæллæттæ, дыккаджы та – кусджытæ. Ныртæккæ специалисттæ æвæрынц хъусынгæнæн системæ, иннæ аз та баивдзысты бæстыхайы алыварс уæлцъар. Куыстыты рæстæг хыгъд цыдысты скъолайы администрацийы фæндонтæ. Афтæ, нæлгоймæгты спортивон дзаумæттæивæн агъуысты скодтой хинайæн кабинæ.
Ацы скъолайы ис мысанæхсæн къорд. Ахæм бирæ скъолаты нæй. Калашниковы автоматы муляжтæ хæцæргарз райхалынæн æмæ æмбырд кæнынæн, ахуыргæнæн винтовкæтæ тирæн, травматикон дамбацатæ – ам алкæддæр хорз ифтонг уыдысты, ныр та ма ахуыртæн агъуыст дæр уыдзæн æмбæлгæ æмвæзадыл. Скъоладзауты хсæн тир тынг парахат у, зæгъынц ахуыргæнджытæ. Къордмæ цæуынц лæппутæ дæр, æмæ чызджытæ дæр.
Кæронмæ фæхæццæ кæны горæты 25-æм скъолайы бындурон цалцæг дæр. 70 азмæ йæм фыццаг хатт зылд цæуы. Куыстытæ 2 азæн нысангонд сты. 3-уæладзыгон бæстыхайы аивта алцыдæр: бæстыхайы сæрæй инженерон хызты онг. Скъолайы директоры курдиатмæ гæсгæ проектмæ хастой ивддзинæдтæ. Афтæ, кълæсты нæмттимæ табличкæтыл фыстытæ сты уырыссаг æмæ ирон æвзæгтыл. Бындурон цалцæгмæ гæсгæ скъолайы разуындыл скодтой Советон Цæдисы Хъæбатыр Остъаты Алексейы хуызимæ мурал. Директоры ныхæстæм гæсгæ ма ныртæккæ баззад лыстæг аивгæнæн куыстытæ.
Бындурон цалцæджы куыстытæ æххæстгонд цыдысты нацпроект «Фæсивæд æмæ сывæллæттæ»-м гæсгæ.
