Аивады артдзæсты сывæллæттæн равдыстой, бирæтæн уарзон уацмысмæ гæсгæ, постановкæ
Скæсæйнаг аргъау «Али Баба æмæ абырджытæ» – бæхты драмон театр «Нартæ»-йы аренæйы. Аивады артдзæсты сывæллæттæн равдыстой, бирæтæн уарзон уацмысмæ гæсгæ, постановкæ. Артистты æмæ бæхы сфæлдыстадон иудзинад у æрдзон рæсугъддзинады, уæнгты аив исты æмæ курдиаты стыр æнтыст. Постановкæйы тыххæй бæлвырддæр радзурдзæн Чехойты Фатимæ.
Бакастæй – хæрзконд, æрдзон тыхæй æххæст, адæймагмæ æгæрон æнувыддзинад æвдисæг. Егъау уæзы – аивдзинад æмæ рæсугъддзинад. Бæх Соломон йæ хæлæрттимæ цæттæ у йæ арæхстдзинад сывæллæттæн равдисынмæ. Бæхты драмон театр «Нартæ» бацæттæ кодта постановкæ æрыгон цæрджытæн. Адæймаджы фидар къухты разамындæй бæхтæ равдисдзысты Али-Бабайы æмæ абырджыты Скæсæйнаг дуне.
Адæмы тыхджын къухæмдзæгъдмæ аренæмæ рацыдысты бæхтæ барджытимæ æмæ райдыдта диссæгты рæстæг. Багаты Хъазыбег йæ арæхстдзинадæй аивадуарзджыты дисы фтауы 25 азы дæргъы. Йæ ныхæстæм гæсгæ, дæсныйад барджытæй домы æрмæст уæнгты фидардзинад нæ. Сæйрагдæр у цыппаркъахыг артистимæ иудзинад банкъарын.
Ног азы фæлладуадзæн бонты республикæйы цæрджытæй æмæ уазджытæй бирæтæ сфæнд кодтой бæхты драмон театр «Нартæ» бабæрæг кæнын. Абарæн æндæр истæимæ кæмæн нæй, аивады ахæм артдзæст æдзух æлвасы йæхимæ адæмы. Хистæртæ æмæ сывæллæттæ ам аныгъуылынц аргъæутты дунейы.
«Али Баба æмæ абырджытæ» – æцæг скæсæйнаг аргъау аив декорацитæ æмæ дарæсимæ. Архайджытæ та- артисттæ æмæ се *нувыд хæлæрттæ. Цæмæй постановкæ алы кары театрдзаутæн цымыдисаг суа, уый хуымæтæг хæс нæу. Фæлæ бирæ азты дæргъы бæхты театр аренæйыл сфæлынды алæмæты дуне.
Артистты æмæ бæхы сфæлдыстадон иудзинад у æрдзон рæсугъддзинады, уæнгты аив исты æмæ курдиаты стыр æнтыст. Ацы хæрзконд цæрæгойтæ æнусты дæргъы сты адæймаджы фарсмæ. Ныфс дарæн ис, 2026-æм аз, йе скæсæйнаг символы хуызæн, адæмæн бирæ хорздзинæдтæ кæй æрхæсдзæн, ууыл.
