Аивадуарзджыты размæ рахастой зындгонд драматург Уильям Гибсоны пьесæ «Двое на качелях»
Евгений Вахтанговы номыл Академион уырыссаг театры уыд ацы азы фыццаг премьерæ. Аивадуарзджыты размæ рахастой зындгонд драматург Уильям Гибсоны пьесæ «Двое на качелях». Уарзондзинады истори ма дзуры иунæгдзинады тыххæй дæр. Уæвгæ та йæ бон æрцæуын уыди алы горæты, алы рæстæджы. Премьерæ бацæттæ кодтой ног бæрæгбонмæ. Ацы аз фыццаг хатт сбæрæг кодтой артисты бон. Бæлвырддæр хабæрттæ радзурдзæн Чехойты Фатимæ.
Фидæны уарзондзинады хъæлæсæй чи ныррухс уыдзæн, уыцы æнæсым телефоны хæтæл. Хъысмæтаразæг ныхасæй рауад, хъайтарты зæрдæты кæрæдзимæ рæсугъд æнкъарæнтæ чи сæвзæрын кодта, ахæм фыццаг фембæлд. Фæлæ архайд хуымæтæг нæу- постановкæйы сæргонд дæр театрдзаутæн ууыл дзуры. «Двое на качелях» у америкаг драматург Уильям Гибсоны уацмыс. Дзуры, царды зындзинæдтæ чи бавзæрста, ахæм адæмыл. Уарзæттæ æнæ кæрæдзи нæ фæразынц, фæлæ уæддæр куы хъæлдзæг вæййынц, куы – æрхæндæг, хаттæй хатт та – æнæныфс. Цæмæй кæрæдзиуыл баууæндой, уый тыххæй Джерри Райанæн æмæ Гитель Москайæн бахъуыд бирæ рæстæг. Уацмысы хъуыды ахсджиаг у алы рæстæджы дæр. Хъайтартæ æнкъарæнтæ зындгонд сты алы театрдзауæн дæр. Уымæ гæсгæ иуварсæй бакæсгæйæ афтæ зыны, цыма актертæ сценæйы хъазгæ нæ кæнынц, фæлæ сæхи царды хабæрттæ дзурынц.
Постановкæйы арф мидис бамбарынæн – æххуыс режиссер Никита Верзилины æрхъуыдыдзинад. Баст у декорацитимæ – адæймаджы фæнды сценæйы цы бирæ рудзгуытæ сæвæрдтой, уыдоны хуылфмæ ныккæсын. Афтæмæй цыма театрдзаутæ сценæйы историйы хай свæййынц – ахæм уыд режиссеры ногдзинады хъуыды.
Спектаклы премьерæйыл бакуыстой ног профессионалон бæрæгбоны кадæн – Артисты бонмæ. Ирд æнкъарæнтæй æххæст изæрæй рауад рæсугъд рæстæг театралон архайджытæн æмæ аивадуарзджытæн. Хæрзконд кафæджы æмæ адвокаты уарзондзинады истори сæ æвæлмастæй нæ ныууагъта.
Пьесæ аргъау нæу. У – хъæлдзæгдзинадæй æмæ рæдыдтытæй æххæст цардæвдисæг уацмыс, зæгъы спектаклы режиссер. Дарддæр йæ разамындæй æвæрд æрцæудзысты, адæмæн ног æнкъарæнтæ чи лæвар кæндзæн, бирæ ахæм постановкæтæ.
