Сценæмæ рахастой, Хуыгаты Георы пьесæмæ гæсгæ спектакль «Сау нымæт»
Тæбæхсæуты Балойы номыл Ирон академион театр суазæг кодта Хуссар Ирыстоны паддзахадон драмон театры коллектив. Сценæмæ рахастой, Хуыгаты Георы пьесæмæ гæсгæ спектакль «Сау нымæт». Сæвæрдта йæ театры аивадон разамонæг Джелыты Хъазыбег. Дыууæ республикæйы театртæм ис бирæ иумæйаг нысантæ. Фæнд кæнынц ахæм фембæлдтытæ æдзух аразын. Бæлвырддæр радзурдзæн Хъайтмазты Дзерассæ.
Цæгат Ирыстоны академион театры кадджын уазджытæ. Æхсызгонæй сæмбæлдысты Хуссар Ирыстоны паддзахадон драмон театры труппæйыл. Уазджытæ сценæмæ рахастой философон уацмыс «Сау нымæт». Ацы балц – хуымæтæг гастрольтæ не сты. Уый у, адæм чи иу кæны, ахæм культурон хид. Раздæр цæгатирыстойнаг артисттæ уазæгуаты уыдысты Цхинвалы. Ацы изæр у дзуапдæттæг балц.
Цæгатирыстойнаг аивадуарзджытæ уазджытыл хъарм зæрдæйы ахастимæ сæмбæлдысты. Залы – аншлаг. Театрдзаутæ æрбацыдысты æнæхъæн бинонтæй, сæ хæлæрттимæ. Ацы пьесæ раздæр æвæрд уыд Тæбæхсæуты Балойы номыл театры дæр. Ныр бирæтæн фæцис, спектакль 2 хуызы феныны фадат. 2 театры разамонджытæм ис фидæнмæ фæндтæ. Ахæм фембæлдтытæ хъуамæ арæзт цæуой æдзух. Сфæлдыстадон коллективтæ зонгæ кæндзысты кæрæдзийы фæлтæрддзинадимæ.
«Сау нымæт»-ы æвæрд ис арф философон хъуыды. Цæрæгойты сурæттыуылты æвдыст цæуынц адæймаджы миниуджытæ æмæ аипдзинæдтæ. Спекталы мидис æмбаргæ у рæзгæ фæлтæрæн дæр. Ахуыр сæ кæны æнусон хæзнатыл: хæлардзинадыл, иузæрдыгдзинадыл.
Хуссар Ирыстоны драмон театр «Сау нымæт» æнтыстджынæй æвдыста Цæцæны республикæйы, Абхазийы, Адыгейы, Ульяновскы æмæ Самарæйы облæстты. Дзæуджыхъæуы спектакль фыццаг хатт равдыстой, æмæ аидвауарзджыты зæрдæтæм æнæмæнг ссардта фæндаг.
