Цылынмæ цыдысты, уæдмæ ахуырдзауты суазæг кодтой 5-æм гимназ æмæ 13-æм скъола
Дзæуджыхъæуы 50-йæм скъолайы кæронмæ æрхæццæ сты бындурон цалцæггæнæн куыстытæ. Цылынмæ цыдысты, уæдмæ ахуырдзауты суазæг кодтой 5-æм гимназ æмæ 13-æм скъола. Ацы бонты ноггонд бæстыхай бабæрæг кодта ахуырады æмæ наукæйы министр Алыбекты Эллæ. Аныхас кодта ахуырдзаутимæ æмæ педагогтимæ, федта ног уавæрты куыст куыд цæуы, уый. Бæлвырддæр хабæрттæ радзурдзæн Хъайтмазты Дзерассæ.
50-æм скъолайы кабинеттæй иуы штукатуркæ æрхауд 2024-æм азы кæрон. Уæд рахастой, ахуыргæнæндоны æнæ радæй бындурон цалцæг скæныны уынаффæ. Куыстытæ райдыдтой фарон майы, азы кæрон та ахуырдзаутæ æмæ педагогтæ æрыздæхтысты ноггонд бæстыхаймæ.
Бындурон цалцæгмæ гæсгæ ахуыргæнæндонæн балхæдтой ифтонггæрзтæ дæр. Кабинетты фæзынд ног хъæддзаума, педагогтæм та – нырыккон кусæнгæрзтæ. Абон сæ активонæй пайда кæнынц ахуырадон процессы.
Спортзалы баивтой пъолтæ æмæ бæстыхайы сæр, фæуæрæхдæр кодтой рудзгуытæ, скодтой цалцæг дзаумæттæивæн агъуыстыты. Хæрæндон дæр зынгæ аивта. Ныр дзы алцыдæр ис, цæмæй кусджытæ се ппæты дæр хæрзад хæринагæй сæххæст кæной, уымæн.
Ахуыргæнæндоны бæстыхай арæзт æрцыд 1937-æм азы, куыд æфсæнвæндаджы скъола лæппутæн. Æмæ уæдæй фæстæмæ бындуронæй иу хатт дæр цалцæггонд нæ уыд. Абон дзы ахуыр кæны 535 сывæллоны. Скъола бабæрæг кодта ахуырады æмæ наукæйы министр Алыбекты Эллæ. Аныхас кодта ахуырдзаутимæ æмæ педагогтимæ, федта ног уавæрты куыст куыд цæуы, æмæ сæйрагдæр, – ахуырадон процесс куыд арæзт у, уый.
Бæстыхайы разуынд дæр сног кодтой. Æмæ уый Алыбекты Эллæйы фæрцы. Фыццаг, ахæм куыстытæ проекты нысангонд нæ уыдысты, фæлæ скъолайы разамынд куыд зæгъы, афтæмæй министр баххуыс кодта ацы фарста алыг кæнын. Бындурон цалцæг æххæстгонд æрцыд нацпроект «Фæсивæд æмæ сывæллæттæ»-м гæсгæ.
