Аивадуарзджытæ абалц кодтой нæ рагфыдæлты дунемæ, ирон æгъдæутты æмæ кувыны композицитæм
Мариинаг театры филиалы Дзæуджыхъæуы арæзт æрцыд национ зарæджы нæлгоймæгты хоры хæдбындур концерт. Аивадуарзджытæ абалц кодтой нæ рагфыдæлты дунемæ, ирон æгъдæутты æмæ кувыны композицитæм. Афтæмæй се ппæтæн фадат уыд рагон культурæ банкъарынæн. Цымыдисаг концерты тыххæй бæстондæр радзурдзæн Чехойты Фатимæ.
Цуан кæнын ирон адæмæн æрмæст хæдзармæ æфтиаг хæссыны хъуыддаг нæ уыд, фæлæ сакралон нысаниуæг кæмæн ис, ахæм фæтк. Хæдзармæ цæугæйæ кодтой зарджытæ, куывтой Хуыцæуттæм. Ахæм постановкæ бацæттæ кодтой адæмæн концерт «Ног бон» саразджытæ. Репертуары хаимæ театрдзаутæ зонгæ сты. Фæлæ программæйы ис ног уацмыстæ дæр.
«Æлвисæн», «Æртхурон», «Нæ буц хистæртæ» – концерт уыд традицитæ æвдисæг. Цæгат Ирыстоны адæмон артисткæ Дзанайты Ольгæйы разамындæй национ зарæджы нæлгоймæгты хор адæмон мотивты æмæ хореографион элементты руаджы равдыста культурон хæзнаты арф хъуыды. Алы постановкæ дæр – музыкæйы *взагæй æвдыст бæрæгбоны фæтк. Театрдзаутæ æрмæст зарджытæм нæ хъусынц, фæлæ кæсынц æнусты дæргъы фæлтæрæй фæлтæрмæ цы æгъдæуттæ лæвæрд цæуынц, уыдонмæ. Æнкъарæнтæ ирддæрæй бавзарынæн æххуыс сты артистты традицион костюмтæ.
Мариинаг театры сценæйы, абоны онг цы рагон зарджытæ хъахъхъæд æрцыдысты, æрмæст уыдон нæ зæлыдысты, фæлæ дзы æвдыст цыдис адæмон бæрæгбæтты фæтк. Концерты хор «Арион»-ы хъомылгæнинæгтæ кæй архайдтой, уый сси ирд æвдисæн фæлтæрты бастдзинадæн.
Артисттæн ахсджиаг у цæмæй, концерты уæвгæйæ, театрдзаутæ базоной æмæ фехъусой ногдзинæдтæ. Цæмæй залы цы бирæ сывæллæттæ уыд, уыдон банкъарой, адæмон традицитæ монон культурæйы бындур кæй сты, æмæ фидæн æнæ уыдонæй кæй не сфидаудзæн, уый.
