Мониторингы архайдтой ахуырады æмæ наукæйы министрады, арæзтады министрады, Дзæуджыхъæуы администрацийы, программæ «Ирыстоны намыс»-ы минæвæрттæ
Парти «Иугонд Уæрæсе»-йы минæвæрттæ сбæлвырд кодтой, скъолаты бындурон цалцæггæнæн куыстытæ куыд æххæстгонд æрцыдысты, уый. Мониторингы архайдтой ахуырады æмæ наукæйы министрады, арæзтады министрады, Дзæуджыхъæуы администрацийы, программæ «Ирыстоны намыс»-ы минæвæрттæ. Партион проект «Ног скъола»-йы активисттæ аргъ скодтой 8-æм скъолайы куыстытæн поселок Южныйы. Ахуыргæнæндоныл цæуы 50 азы. Уыцы рæстæгмæ бирæ лыггæнинаг фарстатæ сæвзæрд. Æппæтæй риссагдæр уыд, бæстыхаймæ зæххы бынæй дæттæ кæй хъардтой, уый. Баивтой скъолайы сæр, æппæт коммуникацитæ, сæххæст кодтой мидаивгæнæн куыстытæ, райстой ног ифтонггæрзтæ. Ныр сывæллæтты ахуырадæн ис æппæт хъæугæ уавæртæ.
Мониторинг арæзт æрцыд Дзæуджыхъæуы 5-æм гимназы райдиан скъолайы дæр. Директор Марина Кулишкина радзырдта, бæстыхай 1937-æм азы арæзт кæй æрцыд, уый. 80-æм азты йæм бафтыдтой хæрæндон æмæ спортзал. Бындурон цалцæг дзы иу хатт дæр нæ уыд. Абон райдиан скъолайы ахуыр кæны 950 сывæллоны. Скодтой сын æмбæлгæ уавæртæ. Ис чысыл фиппаинæгтæ, фæлæ мониторингы архайджытæ зæрдæ бавæрдтой, аразджытæм сæ кæй фæхæццæ кæндзысты, уымæй. Æмтгæй райсгæйæ нацпроектмæ гæсгæ ацы аз республикæйы базилдзысты 24 скъоламæ, сывæллæтты 6 рæвдауæндонмæ æмæ астæуккаг ахуырады 6 объектмæ. Уæвгæ, ног скъолаты арæзтад æмæ чи ис, уыдоны бындурон цалцæг у «Иугонд Уæрæсе»-йы адæмон программæйы ахсджиагдæр къабæзтæй иу.
