Специалисттæ йын скодтой бындур
Ахуырадон центр «Ног горæт»-ы арæзт цæуы ног бæстыхай. Специалисттæ йын скодтой бындур. Объекты фæллой кæнынц 20 кусæгæй фылдæр. Эксплуатацийы йæ куы радтой, уæд æм раивдзысты райдиан скъола. Кабинеттæй дарддæр дзы уыдзысты фæлладуадзæн зонæтæ, аивæдты студи æмæ æндæр ирхæфсæнтæ. Сави кæндзысты алфамблай территори дæр. Бæлвырддæр хабæрттæ радзурдзæн Хъайтмазты Дзерассæ.
Арæзтад райдыдта æрæджы – ивгъуыд азы кæрон. Специалисттæ сæххæст кодтой зæххы куыстытæ, бавнæлдтой бындур æвæрынмæ, сæвæрдтой арматурон конструкцитæ фидæны къултæ æмæ колоннæтæ фидар кæнынæн. Объекты æрвылбон фæллой кæнынц 20 кусæгæй фылдæр. Уаццаджы хицауы ныхæстæм гæсгæ, æппæт процесстæ цæуынц нысангонд фæткмæ гæсгæ. Куыддæр хорз бонтæ ракæна, афтæ аразджытæ бавналдзысты иннæ къæпхæнмæ.
Ног бæстыхай суыдзæн ахуырадон центр «Ног горæт»-ы дыккаг корпус. Бынат дзы уыдзæн 500 ахуырдзауæн. Эксплуатацимæ йæ куы радтой, уæд æм раивдзысты райдиан скъола. Уый уыдзæн нырыккон ахуырадон объект. Сывæллæтты ахуырадæн дзы уыдзæн зæрдæмæдзæугæ уавæртæ. Ам фæзындзæн спортивон, актон æмæ хореографион залтæ. Уæлдай æргом аздахдзысты робототехникæйы кабинетмæ, цæмæй скъоладзаутæн сæ бон уа ацы къабазы рæзын.
Ахуырадон кабинеттæй фæстæмæ ма бæстыхайы самал кæндзысты сывæллæттæн фæлладуадзæн зонæ, методикон кабинет педагогтæн, шахматты уазæгуат æмæ аивæдты студи. Проектмæ гæсгæ уыдзæн медицинон кабинеттæ æмæ уæрæх хæрæндон. Дзуапп дæтдзысты нырыккон домæнтæн. Саив кæндзысты алфамблай территори дæр. Бæстыхай арæзт цæуы нацпроект «Фæсивæд æмæ сывæллæтты» федералон программæмæ гæсгæ. Объект фæнд кæнынц 2028-æм азы радтын.
