Фестивальмæ цæттæ кæныны фарстатыл æрныхас кодтой Хицауады Сæрдар Дзанайты Барис æмæ Мæскуыйы Евгений Вахтанговы номыл театры директор Кирилл Крок
Дзæуджыхъæуы 6-æмæй – 12-æм июльмæ арæзт æрцæудзæн æртыккаг Æппæтуæрæсеон театралон фестиваль «Вахтангов. Путь домой». Культурон цауыл бакуыстой Евгений Вахтанговы номыл театр, Вахтанговы номыл театрæн æххуысы æмæ рæзты Центр, культурон хъæппæристы Президентон Фонд æмæ Цæгат Ирыстоны Сæргълæууæг Сергея Меняйло. Фестивальмæ цæттæ кæныны фарстатыл æрныхас кодтой Хицауады Сæрдар Дзанайты Барис æмæ Мæскуыйы Евгений Вахтанговы номыл театры директор Кирилл Крок. Премьер-министр куыд загъта, афтæмæй нæ регионæн уый у егъау æмæ ирд цау. Кирилл Крок бафтыдта, ацы сæрды Дзæуджыхъæуы сæ хуыздæр постановкæтæ равдисдзысты фондз паддзахадон театры нæ бæстæйы алы рæттæй. Спектакльтæ цæудзысты æртæ фæзы: Тæбæхсæуты Балойы номыл Ирон академион театры, Евгенийы Вахтанговы номыл Академион уырыссаг театры, стæй Маринаг театры цæгтаирыстойнаг филиалы (оперæ æмæ балеты театры). Ацы аз фестивалы программæ баххæст кæндзысты ахуырадон программæйæ. Ацæудзæн Вахтанговы Хæдзары арт-кафейы. Культурон марафон байгом уыдзæн 6-æм июлы. Уæрæсейы адæмты иудзинады азы кадæн арæзт æрцæудзæн парад. Уынгты театртæй дарддæр æм хонынц республикæйы сфæлдыстадон коллективтæ æмæ национ-культурон æхсæнадтæ. 12-æм июлы та, фестивалы кæронбæттæн бон Сæрибардзинады фæзы уыдзæн стыр концерт, Вахтанговы номыл Паддзахадон академион театры артистты архайдимæ. Кадджын уазджыты хсæн уыдзæысты Данила Козловский æмæ Клава Кока. Традицимæ гæсгæ ма, фестивалы фæлгæты саккаг кæндзысты æртæ премийы.
