Баст уыд йæ цард æмæ сфæлдыстадимæ, стæй йæ райгуырæн бонимæ
Зындгонд ирон композитор æмæ дирижер, паддзахадон ансамбль «Симд»-ы бындурæвæрæг Галаты Барисы хæдзар-музейы арæзт æрцыд концерт. Баст уыд йæ цард æмæ сфæлдыстадимæ, стæй йæ райгуырæн бонимæ. Мадзæлтты программæйы уыдысты экскурситæ æмæ æвзонг музыкантты равдыстытæ. Галаты Барисы номыл культурæйы Фонды директор Гаглойты Лианæ куыд радзырдта, афтæмæй зындгонд композитор стыр æвæрæн бахаста канд Ирыстоны нæ, фæлæ æппæт Советон бæстæйы культурон хæзнадонмæ. Мысæн изæры ирддæр мадзал сси æвзонг музыкантты рацыд. Студи «Бонвæрнон»-ы хъомылгæнинæгтæ раргом кодтой сæ музыкалон курдиат. Ацагътой, Ирыстоны культурон хъæздыгдзинад чи æвдисы, уыцы æнæмæлгæ аивадон уацмыстæ. Галаты Барис ирд фæд ныууагъта культурон царды. Йæ разамындæй арæзт æрцыдысты бирæвæрсыг музыкалон коллективтæ. Райрæзыд хоры зарæггæнджыты культурæ, æмæ ма бахъахъхъæдтой традицион музыкалон фольклор. Абон дæр йæ зарджытæ зæлынц бæрæгбоны мадзæлтты. Ансамбль «Симд» та ныр дæр нымад у национ культурæйы хъæздыг бынтыл.
