Кæфтытæ æмæ советон кинонывтæй зарджытæ
Æнæниздзинад лæваргæнæг хæрзаудæн традици. Дзæуджыхъæуы æфсæддон госпиталы реабилитаци цы хæстонтæ цæуынц, уыдоны зæрдæтæ сæ курдиатæй барухс кодтой ансамбль «Амонд»-ы æмæ культурæйы колледжы минæвæрттæ. Кæфтытæ æмæ советон кинонывтæй зарджытæ. Рауад дзы аивады бæрæгбон. Куыд ацыд, уый тыххæй бæстондæр радзурдзæн Чехойты Фатимæ.
Хæрзаудæн концерт Дзæуджыхъæуы æфсæддон госпиталы байгом кодта ансамбль «Амонд». Республикæйы культурæйы колледжы студенттæн мадзалы архайдæн ис стыр нысаниуæг. Ам реабилитаци чи цæуы, уыцы æфсæддонты раз сæ курдиат æвдисынц æндæрхуызон – зæрдиагдæрæй, концерты ахсджиагдзинад æмбаргæйæ.
Концерт сарæзтой Фыдыбæстæ хъахъхъæнæджы æмæ Сæрмагонд операциты тыхты кадæн. Уыд бирæжанрон: ирон кæфтытæ ивтой хорегорафион постановкæтæ: сценæйы сæ курдиат æвдыстой мимтæ. Зæлыдысты бирæтæн зонгæ æмæ уарзон зарджытæ советон рæстæджы ист кинонывтæй. Аивады æвзагæй колледжы студенттæ дзырдтой лæгдзинады, мысинæгты æмæ бæстæйы иудзинады тыххæй.
Колледжы студенттæн ахæм фембæлд фыццаг нæу, фæлæ хорз традици. Хæрзаудæн концертты, стæй патриотон нысаниуæг кæмæн ис, ахæм мадзæлтты архайд у се сфæлдыстадон æмæ граждайнаг æмбарынады хай.
Ныртæккæ госпиталы се *нæниздзинад фидар кæнынц дæсгай æфсæддонтæ Уæрæсейы алы регионтæй. Сæ ныхæстæм гæсгæ, музыкæ, кафт æмæ тыхджын къухæмдзæгъд сæ рох кæнын нæ уадзынц: бæстæйы цæрджытæ сæ фарсмæ кæй сты, сæ хæдзæртты сæм кæй æнхъæлмæ кæсынц æмæ кæй æууæндынц, тагъд рæстæг кæй сыздæхдзысты, ууыл.
