Баивтой бæстыхайы сæр, коммуникацитæ
Беслæны Цæгат Ирыстоны паддзахадон базарадон-экономикон колледжы цæуынц бындурон цалцæггæнæн куыстытæ. Райдыдтой сæ ивгъуыд аз. Баивтой бæстыхайы сæр, коммуникацитæ. Куыстытæ цæуынц национ проект «Фæсивæд æмæ сывæллæттæ» ххæстгæнгæйæ. Бæстондæр радзурдзæн Чехойты Фатимæ.
Йæ 60 азон историмæ ацы ахуыргæнæндонæн йæ ном иу æмæ дыууæ хатты ивд не *рцыд, æнæивгæ-иу баззад куыстуат йæхæдæг. Дæсгай азты æнхъæлмæ кæсыны фæстæ Беслæны Цæгат Ирыстоны паддзахадон базарадон-экономикон колледжæн ралæууыд ног рæстæг. Фарон райдыдта йæ бындурон цалцæг. Куыстытæ цæуынц ахуырадон бæстыхайы æмæ æмдзæрæны. Ныридæгæн ын райхæлдтой йæ сæр, стæй зæронд конструкцитæ.
Егъау ивддзинæдтæ æрцæудзысты 4 уæладзыгон æмдзæрæны. Тынг базилинаг кæй уыдис, уый тыххæй дзы 10 азы дæргъы цæрæг нæ уыд.
Ивгъуыд аз бындурон цалцæггонд æрцыд фыццаг ахуырадон бæстыхай. Баивтой йын йæ сæр, коммуникацитæ, базылдысты йын йе *ддаг къулмæ. Æнæбюджетон фæрæзтæй балхæдтой хъæугæ техникон ифтонггæрзтæ. Цæмæй ахуырад æмбæлгæ уагыл цæуа, уый тыххæй арæзт æрцыдысты æппæт фадæттæ, зæгъынц техникумы минæвæрттæ. Студентты нымæц у 150.
Бындурон цалцæг цæуы национ проект «Фæсивæд æмæ сывæллæттæ» æххæстгæнгæйæ. Фæткмæ гæсгæ æппæт куыстытæ кæронмæ хъуамæ æххæстгонд æрцæуой ног аз.
