Бæстыхай сарæзтой 70 азы размæ
Мæздæджы районы Раздольнæйы хъæуы скъолайы райдыдта бындурон цалцæг. Бæстыхай сарæзтой 70 азы размæ. Ныртæккæ специалисттæ фесты зæронд конструкциты рацарæзт. Скъоладзауты уал ласынц Хъызлармæ. Цалцæггæнæн куыстытæ æххæстгонд цæуынц национ проект «Ахуырад»-мæ гæсгæ. Бæстондæр радзурдзæн Чехойты Фатимæ.
Раздольнæйыхъæуы скъолайы цалцæггæнæн куыстытæ æрæджы райдыдтой. Фæлæ ныридæгæн аразджытæ бакодтой егъау цæттæгæнæн куыст – кæронмæ фесты хæлд зæронд конструкцитæ. Фæнд кæнынц бæстыхай бындурон цалцæг скæнын. Сног ын кæндзысты йе*ддаг къул, баивдзысты йын йæ сæр æмæ йæ пъолтæ, мидæгæй бакæндзысты аивгæнæн куыстытæ. Ноггонд æрцæудзысты æппæт инженерон хызтæ, стæй хъармгæнæн системæ.
Объекты фæллой кæнынц 10 аразæджы. Куыстытæ цæуынц къæпхæнгай – аххæссыдысты æппæт бæстыхайыл. Скъола арæзт æрцыд ивгъуыд æнусы 50-æм азты, уæдæй нырмæ уыд тынг базилинаг. Ахуырадон бæстыхайæ уæлдай цалцæггонд æрцæудзæн спортивон зал. Арæзт у хицæнæй. Цалцæджы фæстæ йæ дуæрттæ гом уыдзысты æрмæст ахуырдзауты нæ, фæлæ хъæуы цæрджыты размæ дæр. Ныр та уал скъоладзауты Раздольнæйыхъæуæй ласынц Хъызлармæ, уым цæуынц сæ урочытæ. Ахуыргæнæндоны директоры хæстæ рæстæгмæ æххæстгæнæг Наталья Чичеровайы ныхæстæм гæсгæ, бындурон цалцæгмæ рагæй æнхъæлмæ кастысты. Скъолайы рацарæзт суыдзæн ахсджиаг цау æнæхъæн хъæуæн дæр.
Федералон программæтæм гæсгæ Мæздæджы районы фæстаг æхсæз азмæ бындурон цалцæггонд æрцыдысты 18 ахуыргæнæдоны. Афтæмæй, сæдæгай скъоладзауæн арæзт æрцыдысты нырыккон æмæ æнцонвадат уавæртæ ахуыр кæнынæн.
Цалцæг фæуынвæнд кæнынц 1-æм сентябрьмæ. Æппæт куыстытæ æххæстгонд цæуынц национ проект «Ахуырад»-мæ гæсгæ.
