Республикæйы скъоладзаутæн арæзт цæуынц æппæт фадæттæ хорз бæрæггæнтæ райсынæн
Иумæйаг паддзахадон, лæмбынæг ахаст æмæ хорз цæттæдзинад чи домы, ахæм фæлварæн. Республикæйы скъоладзаутæн арæзт цæуынц æппæт фадæттæ хорз бæрæггæнтæ райсынæн. Дзæуджыхъæуы æмæ районты кусынц цæттæгæнæн лæвар Центртæ. 19 дзы байгом сты 2024-æм азы Сергей Меняйлойы амындмæ гæсгæ. Уыдонæй иу бабæрæг кодта не сфæлдыстадон къорд. Бæстондæр радзурдзæн Чехойты Фатимæ.
Дзæуджыхъæуы 11-æм скъолайы рауагъдон Уртаты Тимур иумæйаг паддзахадон фæлварæнмæ цæттæ кæнын райдыдта 10-æм къласы ахуыргæнгæйæ. Фæнд кæны йæ гæххæттытæ Губкины номыл нефты æмæ газы Уæрæсейы паддзахадон университетмæ бадæттын. Уый тыххæй фæлварæнтæн равзæрста физикæ, информатикæ æмæ математикæ. Се скъолайы цы Центр кусы, уым йæхи цæттæ кæны физикæйæ. Лæппуйы ныхæстæм гæсгæ, уæлæмхасæн ахуыртæ фаг сты иумæйаг фæлварæны хорз зонындзинæдтæ равдисынæн.
11-æм скъолайы иумæйаг паддзахадон фæлварæнмæ рауагъдонтæ сæхи цæттæ кæнынц историйæ, англисаг æвзагæй, физикæйæ æмæ математикæйæ. Ахуыргæнæндонмæ æрбацæуынц Дзæуджыхъæуы Промышленнон районы 6 скъолайы минæвæрттæ. Зондамонджытæ – хуыздæртæй хуыздæртæ. Се *хсæн – 33-æм скъолайы физикæйы ахуыргæнæг Иринæ Боровцова. Центры рауагъдонты цæттæ кæны 2-аг аз.
Иумæйаг паддзахадон фæлварæнмæ цæттæ кæныны лæвар Центртæ байгом сты республикæйы Сæргълæууæг Сергей Меняйлойы хъæппæрисæй. Кусынц Цæгат Ирыстоны алы районы дæр. Ацы аз сæ нымæц фæфылдæр, систы 19. Уæлдай æргом аздæхтой æрдзон-зонадон циклы предметтæм: физикæ, хими æмæ информатикæ бафтыдтой, кæм нæ уыдысты, уыцы Центрты ахуырадон фæткмæ.
Лæвар ахуыртæм хи ныффыссын æнцон у. Фæндон фехъусын кæнын хъæуы къласы разамонæгæн, кæнæ та курдиат бадæттæн ис, цæттæгæнæн Центр цы скъолайы кусы, уыцы ахуыргæнæндонмæ.
