Ахуыргæнæндон бабæрæг кодтой республикæйы районтæй скъоладзаутæ
Цæгат Кавказы хæххон-металлургон институт йæ дуæрттæ байгом кодта абитуриенттæн. Ахуыргæнæндон бабæрæг кодтой республикæйы районтæй скъоладзаутæ. Алы факультеты дæр сын сарæзтой дæсныйадæвдисæг ахуыртæ. Рæзгæ фæлтæр федтой нырыккон лабораторитæ, бацархайдтой экспериментты æмæ фæлварæнты. Хæххон-металлургон институт ахадгæйæ рæзын кæны нысанон ахуырады системæ, платформæ «Работа в России»-мæ гæсгæ. Бæлвырддæр радзурдзæн Хъайтмазты Дзерассæ.
Ахæм резюме металлургон факультеты деканæй Беслæны 4-æм скъолайы ахуырдзауæн æхсызгон у. Доййаты Георгий йе мкъласонтимæ æрбацыд уазæгуаты Цæгат Кавказы хæххон-металлургон институтмæ, цæмæй, гæнæн ис, æмæ ног ахуыры аз суа ахуыргæнæндоны резидент. Гом дуæртты боны фæрцы скъоладзаутæ банкъардтой студент уæвын цы нысан кæны, уый.
Студенттæ ам хуымæтæг зонындзинæдтæ нæ исынц. Æнтыстджынæй архайынц экспериментты. Кæмæндæр ацы фæлтæрæнтæ цыдæр диссаг сты, фæлæ æрмæст металлургон факультеты минæвæрттæн нæ. Ахуыргæнæндоны рагондæр факультетмæ чи æрбацæуа, уыдоны алцæуылдæр сахуыр кæндзысты. Ацы дæсныйад парахат у, рауагъдонтæ æнæ куыстæй нæ баззайдзысты.
Хæххон-металлургон институтмæ гом дуæртты бонмæ æрбацыдысты скъоладзаутæ республикæйы алы районтæй. Сæ фылдæр сты, ахуыргæнæндонмæ бацæуын чи фæнд кæны, уыдон. Абитуриенттæн алы факультеты дæр бацæттæ кодтой дæсныйадæвдисæг ахуыртæ.
Абон хæххон-металлургон институты ахуыр кæны 6 мин студенты онг. Уыдонæй 2 мины – бирæвæрсыг колледжы. Ам ис техникон къабазы дæсныйæдтæ. Сæ хыгъды – металлурги, хæххон хъуыддаг, геологи, арæзтад, информацион технологитæ, электрон техникæ æмæ электромеханикæ. Ис сахуыр кæнын юриспруденцийыл æмæ экономикæйыл. Уæрæсейы Хуссар хайы уæлдæр ахуыргæнæндæтты хсæн институт у раззагдæртæй иу.
