Кусджытæ ныридæгæн райхæлдтой бæстыхайы сæр, базылдысты фыццаг уæлдадзыгмæ
Беслæны 20 азмæ фыццаг хатт бындуронæй цалцæг кæнынц сывæллæтты 5-æм рæвдауæндон. Кусджытæ ныридæгæн райхæлдтой бæстыхайы сæр, базылдысты фыццаг уæлдадзыгмæ. Куыстытæ фæуынмæ хъавынц ноябры кæронмæ. Бæлвырддæр хабæрттæ радзурзæн Хъайтмазты Дзерассæ.
Беслæны сывæллæтты 5-æм рæвдауæндон бындуронæй фыццаг хатт цалцæг кæнынц. Специалисттæ кусын райдыдтой мартъийы. Уыцы рæстæгмæ бакодтой ахсджиаг куыстытæ. 2-уæладзыгон бæстыхайы сæры иу фарс æххæстæй райхæлдтой. Фыццаг уæладзыджы фесты къултæ штукатуркæ кæнын. Сæххæст кодтой электромонтажон куыстытæ дæр. Уыцы иу рæстæг объекты фæллой кæны 5 бригады.
Алы лыстæг хъуыддагмæ дæр бæлвырд цæстдард. Розеткæтæ æмæ сантехникæ, агъуыстыты дизайн, хуызтæ равзарын. Цалцæггæнæн куыстыты рæстæг хыгъд цæуынц сывæллæтты рæвдауæндоны администрацийы æппæт фæндонтæ.
Рæвдауæндоны ис 130 сывæллонæй фылдæр. Цалцæджы рæстæгмæ уал сæ раивтой районы иннæ ахуырадон кусæнуæттæм.
Бындурон цалцæг æххæстгонд цæуы паддзахадон программæ «Ахуырады райрæзт»-мæ гæсгæ. Пъланмæ гæсгæ куыстытæ хъуамæ фæуой ноябры кæрон.
