Абон коллектив Уæрæсейы адæмон артист Владимир Уваровы разамындæй сценæйы иу кæны классикæ нырыккон драматургиимæ
Уырыссаг академион театр бæрæг кæны йæ 155 азы бон. Уыцы рæстæгмæ культурон артдзæсты райгуырд бирæ стыр курдиæттæ. Аивадæн дзы лæггад кодтой Евгений Вахтангов, Михаил Булгаков æмæ Хетæгкаты Къоста. Абон коллектив Уæрæсейы адæмон артист Владимир Уваровы разамындæй сценæйы иу кæны классикæ нырыккон драматургиимæ. Спектакль «Маскарад» та бацыд бæстæйы «Сыгъзæрин фонд»-ы хыгъдмæ. Юбилейон сезоны театр цæттæ кæны ног премьерæтæ æмæ фыццаг хатт архайдзæн æппæтуæрæсеон фестиваль «Вахтангов. Путь домой»-ы. Бæлвырддæр радзурдзæн Хъайтмазты Дзерассæ.
Ацы сценæимæ баст у бæстæйы театралон аивады стыр хай. Сæрмагондæй ам агуырдта йæ театралон философи Евгений Вахтангов, Михаил Булгаков та, медицинæ ныууадзгæйæ, кодта аивады фыццаг къахдзæфтæ. Ацы культурон артдзæсты сценографимæ бандзæвыд Хетæгкаты Къоста. Театрæй ракъахдзæф кодтой культурæйы бирæ номдзыд архайджытæ.
Фыдыбæстæйы Стыр хæсты азты дæр театр йæ архайд нæ ныууагъта – æвæрдта спектакльтæ, артисттæ фронты салдæтты зæрдæтæ рухс кодтой сæ аивадæй. Фыццаг театралон сезон та Уырыссаг театры байгом Михаил Лермонтовы «Маскарад»-æй. Æмæ та 150 азы фæстæ пьесæ æрыздæхт стыр сценæмæ.
Хъæрджынты Изабеллæйы æвæрд спектакль «Маскарад» бацыд «Уæрæсейы театралон постановкæты сыгъзæрин фонд»-мæ.
Цалынмæ актертæ сæхиуыл рольтæ барынц, уæдмæ ахæм репитици цæуы фæскулисæты дæр. Звукорежиссертæ сценæмæ нæ рацæуынц, фæлæ æмархайд кæнынц актертимæ. Стыр æвæрæн иумæйаг хъуыддагмæ хæссынц нывгæнджытæ æмæ бутафортæ дæр. Режиссеры хъуыды цалынмæ театрдзаутæм бахæццæ вæййы, уæдмæ уал ацæуы дæргъвæтин фæндаг.
Театры аивадон разамонæг Владимир Уваров 3 азы размæ сси сæрмагонд преми «Золотая маска»-йы лауреат. Театры сæргъы лæууы ныр 30 азы, абон дæр архайы спектакльты.
Разæй бирæ сфæлдыстадон фæндтæ. Ацы аз труппæ фыццаг хатт архайдзæн æппæтуæрæсеон фестиваль «Вахтангов. Путь домой»-ы. Театрдзауты размæ рахæсдзæн уарзон спектакль «Сотворившая чудо». Юбилейон сезон байгом кодтой спектакль «Кин IV»-йæ, сезоны фыццаг премьерæ та суыдзæн Леонардо Да Винчи-йы тыххæй мюзикл «Леонардо».
