Альманахы фыццаг сери ист у, ирон æвзаг æмæ литературæйы бындурæвæрæг Хетæгкаты Къостайы цардвæндагыл
Дзæуджыхъæуы исынц фысджыты номыл документалон цикл. Альманахы фыццаг сери ист у, ирон æвзаг æмæ литературæйы бындурæвæрæг Хетæгкаты Къостайы цардвæндагыл. Мæскуыйаг сфæлдыстадон къорд егъау куыст бакодта архивты. Къостайы тыххæй серийæ аивадуарзджытæ хъуамæ базоной, поэты цардæй зындгонд цы цаутæ не сты, уыдон. Премьерæйы тыххæй бæстондæр радзурдзæн Чехойты Фатимæ.
Иу сери Хетæгкаты Къостайы номыл сисын уыд къорды уæнгты иумæйаг фæнд. Поэты курдиат сæ сразæнгард кодта Цæгат Ирыстонмæ ссæуын. Документалон циклæн ныр у йæ дыккаг сезон, æмæ йæ байгом кæндзæн ирон фыссæджы тыххæй ист серийæ.
Проекты нысан – литературон бынтæн егъау иртæст саразын. Ног сезоны радзурдзысты Хетæгкаты Къостайы, Расул Гамзатовы, Давид Кугультиновы æмæ æндæр поэтты тыххæй. Киноныв сисыны размæ стыр куыст бакодтой архивты, фæлæ режиссеры ныхæстæм гæсгæ, Цæгат Ирыстоны уæвгæйæ бантыст базонын ног, ныры онг зындгонд цы цаутæ нæ уыдысты, ахæмтæ.
Хетæгкаты Къоста – ирон культурæйы историйы сæйрагдæр адæмæй иу. Йе сфæлдыстад – адæмы хъысмæт, хæзнатæ æмæ нысантæ *вдисæг. Проект саразджытæ куыд фæнысан кодтой, уымæ гæсгæ ахсджиаг у, цæмæй поэты тыххæй фылдæр адæм базоной, уыимæ æрмæст республикæйы нæ, фæлæ бæстæйы цæрджытæ.
Проектыл кусы дæсны къорд – фæлтæрдджын режиссертæ, оператортæ æмæ сценаристтæ. Базонгæ сты поэты царды хабæрттимæ, фæлæ федтой кæм цардис æмæ сфæлдыстадон куыст кæм кодта, уыцы бынæттæ. Документалон киноныв исынц Къостайы хæдзар-музейы. Уыдысты поэты райгуырæн хъæу Нары. Сæ хæсыл нымайынц Къостайы тыххæй фылдæр хабæрттæ базонын. Проект æххæстгонд цæуы культурон хъæппæристы Фонды æххуысæй. Фыццаг сезоны къорд абалц кодта бæстæйы 14 регионыл, 60 фыссæджы систы документалон циклы хъайтартæ. Алы сери дæр у 30 минуты. Хетæгкаты Къостайы номыл равдыстæй базонæн уыдзæн æрмæст йе сфæлдыстадон бынты тыххæй нæ, фæлæ поэты тыххæй адæмæн ныры онг зындгонд цы цаутæ нæ уыдысты, æхæмтæ.
