Труппæ аивадуарзджыты размæ рахаста 3 спектаклы
Максим Горькийы номыл Хъырымы академион уырыссаг театрæн фесты йæ цæгатирыстойнаг дзуапдæттæг гастрольтæ. Труппæ аивадуарзджыты размæ рахаста 3 спектаклы. Уыдонæй иу «Стоянка в Нагасаки» у уæлдай уарзондæр. Япойнаг чызг æмæ уырыссаг офицеры истори дисы бафтыдта алкæйы дæр. Дарддæр радзурдзæн Чехойты Фатимæ.
Гæххæттæй конд рухсгæнæнтæ, сакурæйы сыфтæ æмæ кимонойы уынæр. «Стоянка в Нагасаки» – скæсæны бæстæйы цы уарзондзинад сæвзæрд, уый тыххæй истори.
19-æм æнусы япойнаг портты традицион «рæстæгмæйы къайад»-æй рауад æнхъæл дæр цæмæн нæ уыдысты, ахæм хъуыддаг. Наудзог Владимир Коковцев æмæ япойнаг Окини-сан фыццаг бакастæй бауарзтой кæрæдзийы, фæлæ куысты æмæ уæды рæстæджы æхсæнады мæнгæнхъæлцы тыххæй фæхицæн сты. Уырыссаг-япойнаг хæсты уæззау рæстæг хъайтартæн сæ рæсугъд æнкъарæн сæ зæрдæты цард дæсгай азтæ. Сæ историйæн йæ кæрон амондджын нæ рауад. Окини-саны сурæт саразæг Валентина Шляховайæн уарзондзинад сценæйы равдисын уыд æхсызгон. Уый тыххæй йын ацы спектакль у йæ зæрдæмæ хæстæг.
Гæнæн ис æмæ Владимир Коковцев, нау «Верный»-ы сæйраг офицер Геннадий Арсеньев куы нæ уыдаид, уæд Окини-саныл никуы сæмбæлдаид. Йæ сурæт ын чи сарæзта, уыцы Антон НаврОцкий арæхстджынæй бакуыста хъайтары миниуджытæ æххæстæй равдисыныл. Ацы куыст йæ зæрдæмæ тынг цæуы, уæлдай цымыдисаг ын хъайтары равдисын раздæр æрыгонæй, фæстæдæр та – хистæр кары адæймагæй.
Владимир КокОвцевы роль сарæзта спектаклы режиссер Сергей Ющук. 90-æм азты цы хъайтарты сурæттыл куыста, уыдон уыдысты æрыгон адæм. Бирæ азты фæстæ раздæхт, царды хабæрттæ зындгонд кæмæн сты, уыцы наудзоджы рольмæ. Режиссеры æмæ актеры фæлтæрддзинад ын иу постановкæйы ногдзинад нæу.
Драмон спектакль фыст у Валентин ПИкулы «Три возраста Окини-сан»-ы романмæ гæсгæ. Постановкæ Хъырымы театры гастрольты фæткмæ ныры онг хаст никуы уыд. Ацы гастрольтæ сын Тæбæхсæуты Балойы номыл паддзахадон академион театримæ сты дзуапдæттæн. «Стоянка в Нагасаки»-йæн ирон театрдзаутæ стыр аргъ скодтой.
Хъырымы академион театр Цæгат Ирыстоны цæрджытæн сси уарзондæртæй иу. Аивадуарзджытæ æнхъæлмæ кæсдзысты труппæйы радон гастрольтæм цымыдисаг постановкæтимæ.
