Йæ курдиаты фæрцы фæндаг ссардта мингай аивадуарзджыты зæрдæтæм
Абон 80 азы сæххæст уыдаид зындгонд ирыстойнаг актер, режиссер Дзиуаты Анатолийыл. Йæ курдиаты фæрцы фæндаг ссардта мингай аивадуарзджыты зæрдæтæм. Каст фæци Мæскуыйы театралон аивады паддзахадон институт, æмæ сыздæхт йæ уарзон Ирыстонмæ. Кинойы æмæ театры рольтæй дарддæр ма историйы баззад куыд фыццаг бæхты драмон театр «Нартæ» саразæг. Йæ цардæй ахицæн 10 азы размæ. 2024-æм азæй фæстæмæ та бæхты театр хæссы йæ ном. Дзиуаты Анатолийы цардвæндаджы тыххæй радзурдзæн Чехойты Фатимæ.
Аивадуарзджытæн зындгонд уыд куыд Сталины сурæт саразæг бирæ кинонывты. 12 хатты фæзынд кадры уыцы ролы. Ирыстоны Дзиуаты Анатолийы бауарзтой йæ дæсны куысты тыххæй кинонывты æмæ театралон постановкæты.
Мæскуыйы Театралон аивады паддзахадон институты актерты факультет каст куы фæци, уæд Дзиуаты Анатолий æрыздæхт йæ райгуырæн зæххмæ. Цæгат Ирыстоны академион театры хъазыд спектакльтæ «Ревизор», «Кæфтыты ахуыргæнæг», «Костыль для лондонского квартала»-йы. Уырыссаг драмоны та – «Правда памяти» æмæ «Коня диктатору» -йы. Цы бирæ сурæттæ сарæзта, уыдонæй дыууæ – Принц Гамлет æмæ баснятæ фыссæг Эзоп театрдзауты зæрдæтæм уæлдай тынгдæр фæцыдысты. Уыдоны фенды фæстæ райхæлд адæмы уарзондзинад Дзиуаты Анатолимæ.
1979-æм азы Дзиуаты Анатолий каст фæци ГИТИСЫ режиссерты факультет. Дзæуджыхъæуы æмæ Мæскуыйы сценæты сæвæрдта спектакльтæ «Загнанная лошадь», «Король Лир», «Эдип-царь» æмæ «Дом Бернарды Альбы». Уарзон кинонывтæ «Чермен», «Море в огне», «По следам карабаира», «Кольцо старого шейха»-йæн Дзиуаты Анатолий цы сурæттæ сарæзта, уыдон адæм дæсгай азты фæстæ дæр ма дарынц сæ зæрдæты.
Уæрæсейы фыццаг бæхты драмон театр «Нартæ» -йы саразæг у Дзиуаты Анатолий. Цæгат Ирыстоны адæмон артисты разамындæй сценæйы бантыст равдисын æцæг алæмæты архайд. Баиу кодта джигитовкæ, хореографи æмæ драматургийæ. Спектакль «Хъодыгонд зæд» кæй сæвæрдта, уый тыххæй Уæрæсейы аивæдты сгуыхт кусæг райста Хетæгкаты Къостайы номыл преми. 2024-æм азы къорды хъæппæрисмæ гæсгæ театрæн лæвæрд æрцыд Дзиуаты Анатолийы ном.
Йе *рдзон курдиат æмæ куыстхъомдзинады руаджы Дзиуаты Анатолий йæхи бауарзын кодта мингай адæмæн. Кæд не хсæн нал ис, уæддæр йæ куыстытæ цæрынц ныр дæр.
