Равдысты фенæн ис республикæйы сæйраг горæты архитектурæ, стæй Цæгат Ирыстоны уникалон объекттæ
Классикон пейзажтæй æмæ архитектурон хуызтæй – нырыккон аивадон фæлтæрдтæм. «Дзæуджыхъæу аивады тыгъдады» байгом нывгæнджыты Цæдисы залы. Равдысты фенæн ис республикæйы сæйраг горæты архитектурæ, стæй Цæгат Ирыстоны уникалон объекттæ. Равæрдтой дзы горæты географион æвæрды, фыдæлты хæзнаты æмæ, æнæмæнг, республикæйы сæйраг цæугæдон – Терчы тыххæй уацмыстæ. Бæстондæр хабæрттæ радзурдзæн Чехойты Фатимæ.
Дзæуджыхъæу равдыста йæ миддунейы æнкъарынадмæ гæсгæ. Хæдзары хуымæтæг къул, изæр, рудзгуыты рухс – цæуджытæн æрвылбоны ныв, аивадон кусæгæн та – нæ. Ам, адæймаджы сæрмагонд ахорæнтæ фендзæн æрмæст сфæлдыстадон архайæг. Фендзæн, фæстæдæр та сæ сныв кæндзæн. Равдысты ис æлборты Аннæйы цалдæр куысты. Аивæдты факультеты рауагъдоны ныхæстæм гæсгæ, уæвæн ис æмæ йæ нывтæ зæрдæйы *взæрын кæной æрхæндæгдзинад, фæлæ нывгæнæг афтæ равдыста йæ хъуыдытæ. Авторы ахаст горæтмæ у бынтон æндæр хуызæн.
Алыхуызон, фæлæ зонгæ горæт нывгæнджыты цæстæй фенæн ис равдыст «Дзæуджыхъæу – аивады тыгъдады». Цæгат Ирыстоны сæйраг горæты бакаст алы рæстæджыты дæр æхсызгон уыдис сфæлдыстадон кусджытæн. Фыстой йыл уацмыстæ, музыкæ, нывтæ – Уæрæсейы хуссар хайы гыццыл горæты уæлдæф бакъарынæн. Йæ географион арæнтæ – космосы арфы хуызæн, фенæн æй ис экспозицийы. Дзæуджыхъæуыл балц, равдыстыты залæй нæ рацæугæйæ. Ам уæвгæйæ, адæймаг фестдзæн Терчыбыл, ауайдзæн рагон кæртыты фæрсты. Фенæн ис Сабырдзинады проспекты разуынд 60-йæм азты. Цæст ахæссæн ис горæты сæйраг æмæ уарзондæр пейзаж – хæхты кондыл. Нывгæнджыты разæнгард кодта Дзæуджыхъæуы архитектурæ, цæмæй фæстæдæр разæнгард кæна архитекторты. Байгом кæныны кадджын мадзалы радтой хæрзиуджытæ æмæ арфæйы фыстæджытæ. Республикæйы сгуыхт архитекторы ном лæвæрд æрцыд Владимир Одинцовæн. Раздæр уыд профилон ведомствæйы министры хæдивæг, стæй сæйраг архитектор. Хорз зоны, нывкæнынады æмæ архитектурæйы астæу хæрзчысыл арæн йеддæмæ кæй нæй, уый.
Зындгонд нывгæнджыты æмæ æрыгон авторты куыстытæ – горæты бакаст алы рæстæджыты æвдисæг аивады æмбырдгонд. Уымæн равдыст æндæр истæимæ абарæн нæй. Алы стильты фыст нывтæ – цыма горæты арæзтады историйыл дзурынц. «Дзæуджыхъæу – аивады тыгъдады» у нывгæнджыты Цæдисы регионалон хайады æмæ республикæйы арæзтады министрады иумæйаг проект. Бацæттæ йæ кодтой Архитектурæйы азы кадæн.
Горæты уынгтыл аивадон балц скæнын йæ бон у кæй фæнды, уыдонæй алкæмæн дæр. Экспозици фенæн ис нывгæнджыты Цæдисы равдыстыты залы. Бацæуыны бар у лæвар.
