Ахуыр кæнынц ирон æвзаг æмæ райгуырæн бæстæйы истори
Сæрдыгон каникултæ канд хъæлдзæг нæ вæййынц, фæлæ ма зонадон дæр. Лагерь «Фидан»-ы сывæллæттæ архайынц сфæлдыстадон æмæ спортивон мадзæлтты. Ахуыр кæнынц ирон æвзаг æмæ райгуырæн бæстæйы истори. Алы фæлтæрæн дæр ис йæхи тематикон программæ ирд мидисимæ. Национ æууæлтимæ фæлтæр куыд цæуы, уый тыххæй радзурдзæн Чехойты Фатимæ.
Сæрдыгон каникултæ – фæлладуадзыны æмæ ног æнкъарæнты рæстæг. Сывæллæтты лагерь «Фидæн»-ы хъомылгæнинæгтæн та ма – фадат ирон адæмы культурæ æмæ традицитимæ хæстæг базонгæ уæвынæн. Мадæлон æвзаджы урочытæ сын сты уарзон. Зондамонæг у республикæйы сгуыхт ахуыргæнæг, филолог Хабæты Риммæ. Лагеры кусы дыккаг аз. Йæ педагогон архайды дæргъы бакуыста хицæн программæйыл. Уый сывæллæттæн æххуыс у ирон æвзаг хъазты хуызы ахуыр кæнынæн. Уымæй уæлдай, сывæллæттæ зонгæ кæнынц Ирыстоны историимæ, культурæимæ æмæ традицитимæ, стæй республикæйы зындгонд адæмимæ.
Алывæрсыг программæйы руаджы бирæ сывæллæттæ лагермæ æрбаздæхынц ногæй. Уыдонæн «Фидæн» рагæй сси хæлæрттимæ фембæлыны бынат æмæ аивады тыгъдад. 13-аздзыд Джелыты Кирæ ам дыккаг аз уадзы йæ фæллад. Чызг фарон кæимæ базонгæ ис, уыдонæй бирæтæ арбацыдысты ацы аз дæр. Лагеры Кирæ базыдта нымæт æууæрдын, архайдта аивадон конкурсты æмæ алыхуызон мадзæлтты.
Лагеры ис 8 фæлтæры, байгом дзы кодтой 12 сфæлдыстадон иугонды. Нывкæнынад, кафджыты къорд, гимнастикæ, шахмæттæ – сывæллæттæн фадат ис зæрдæйы фæндонмæ гæсгæ хи ирхæфсынæн. Сывæллæттæ сты 7 азæй 14 азы онг. Лагерь у боныгон. Хъомылгæнинæгтæ фæархайынц дæсныйад æвдисæн ахуырты, спортивон æмæ сфæлдыстадон мадзæлтты. Изæры та ацæуынц сæ хæдзæрттæм.
«Фидæн» сывæллæтты суазæг кæны 40 азæй фылдæр. Кусы республикæйы сывæллæтты сфæлдыстадон галуаны. Алы фæлтæрæн дæр ис йæхи тематикон нысан. Фыццаг цæуы Уæрæсейы адæмты иудзинады азы кадæн. Дыккаджы уæлдай цæстдард цæудзæн сфæлдыстадæн æмæ сывæллæтты креативон хъомысæн. «Мы и есть Осетия» – æртыккаджы ном. «Фидæн» кусдзæн 19 августмæ. Уыцы рæстæгмæ дзы сæ фæллад суаддзысты 700 лæппу æмæ чызджы. Ацы аз лагермæ бахауыны фадат кæмæн нæ уа, уыцы сывæллæттæ хъуамæ æрхæндæг ма кæной – «Фидæн» та йæ дуæрттæ ног аз сæрды дæр байгом кæндзæн.
