5 боны дæргъы дæсныйады æрæджы чи ис, уыцы ахуыргæнджытæ ахуыр кодтой уроктæ цæттæ кæныны æмæ сæ амоныны сусæгдзинæдтæ, арæзт цыдысты дæсныйадæвдисæг ахуыртæ профессионалон дæсныйады конкурсты уæлахиздзаутæй æмæ лауреаттæй
Джызæлы скъола-интернаты фæцис æрыгон педагогты сæрдыгон скъола «Методикон рунæтæ». 5 боны дæргъы дæсныйады æрæджы чи ис, уыцы ахуыргæнджытæ ахуыр кодтой уроктæ цæттæ кæныны æмæ сæ амоныны сусæгдзинæдтæ, арæзт цыдысты дæсныйадæвдисæг ахуыртæ профессионалон дæсныйады конкурсты уæлахиздзаутæй æмæ лауреаттæй. Бæлвырддæр радзурдзæн Хъайтмазты Дзерассæ.
Цалынмæ скъоладзаутæн каникултæ ис, уæдмæ уал партæты уæлхъус сбадтысты ахуыргæнджытæ. æрыгон педагогты сæрдыгон скъолайы архайджыты хсæн Быценты Дея. Ныр 2 азы Михайловскæйы скъолайы кусы истори æмæ æхсæнадзонынады ахуыргæнæгæй. Йæхæдæг дæр ацы ахуыргæнæндон каст фæцис. Джызæлмæ æрыгон педагог æрбацыд ног хъуыдытæм, цæмæй сæ сентябры йæ урочыты спайда кæна, уый тыххæй.
Скъолайы программæ у хъæздыг. Дæсныйадæвдисæг æмæ практикон ахуыртæ, проекттыл куыст. Профессионалон конкурсты уæлахиздзаутæ æрыгон педагогтæн æвдисынц, алы ахуырдзауы дæр сцымыдис кæнын куыд хъæуы, уый. Приемтæй иу – къордгай пазлы метод. Уымæ гæсгæ алчидæр дзуапп дæтты хæслæвæрды бæлвырд хайыл, иумæйаг хатдзæг та арæзт цæуы æппæт командæйы куыстæй.
Æрыгон педагогты сæрдыгон скъола «Методикон рунæтæ» ныр 6-æм хатт арæзт æрцыд. æххæстгонд цæуы республикæйы ахуырады æмæ наукæйы министрады хъæппæрисæй. Квалификаци бæрзонддæр кæныны курсытæй уæлдай ам æргом æрмæст ахуырдмæ не здахынц, фæлæ ма кæрæдзиимæ ныхас кæнынмæ. æрыгон педагогтæ 5 боны цардысты иу командæйы хуызæн, куыстой иумæйаг проекттыл, изæры та-иу дзырдтой профессийы тыххæй. Мадзаларазджыты ныхæстæм гæсгæ, сæрмагондæй афтæмæй равзæры, æмкусджытæ скъолайы фæстæ дæр кæрæдзийæн кæм æххуыс кæнынц, ахæм æхсæнад.
Архайджытæ бахъахъхъæдтой сæ проекттæ. Кæронбæттæны алчидæр ныффыста фыстæг æрыгон æмкусджытæм. Уымæн æмæ тыхджын ахуыргæнæджы архайд райдайы, ахуыр кæныны æмæ иннæттæн фæлтæрддзинад дæттыны фæндонæй.
