Ног сезоны та аивадуарзджытæм æнхъæлмæ кæсынц цалдæр премьерæйы
2-æм августы Мариинаг театры филиал Цæгат Ирыстоны æхгæны йæ 9-æм сезон. Уыдис алывæрсыг цаутæй æххæст. Иу æмæ дыууæ фестивалы арæзт не *рцыдысты. Ног сезоны та аивадуарзджытæм æнхъæлмæ кæсынц цалдæр премьерæйы. Симфонион оркестры концерт уыдзæн йæ кæронбæттæн. Бæстондæр хабæрттæ радзурдзæн Чехойты Фатимæ.
Кæронмæ æрхæццæ кæны 9-æм сезон. Уыдис алывæрсыг. Аивадуарзджытæ æмæ труппæ йæ сæ зæрдæты бирæ азты дардзысты. Хъæздыг уыд ахсджиаг цаутæй. Ам арæзт æрцыдис дыууæ ног фестивалы: «Начало бессмертия» — Фыдыбæстæйы Стыр хæсты рæстæг райгуырæн зæхх хъахъхъæнджыты хъæбатырдзинадыл дзурæг, æмæ зындгонд ирон композитор Ачеты Аркадийы 100 азы райгуырды кадæн «Музыкальное приношение». Фыццагмæ хаст æрцыдысты Григорий Фриды монооперæ «Дневник Анны Франк» , Кирилл Молчановы оперæ «Зори здесь тихие», симфонион æмæ камерон концерттæ, стæй æфсæддон уацмыстæ. Дыккаг та, Ачеты Аркадийы æнæмæлгæ сфæлдыстад аивадуарзджыты зæрдæты æрлæууын кодта, Цæгат Ирыстоны алы рæттæй дзы цы зарæггæнджытæ архайдта, уыдоны хъæлæстæй.
Ивгъуыд аз октябры филиал 7-æм хатт сси фестиваль «Мариинский-Владикавказ»-ы бынат. Мадзал æрвылаз баиу кæны филиалы æмæ Мариинаг театры историон сценæйы артистты, æмæ сæмбырд кæны аивадуарзджытæй дзаг залтæ. 9-æм сезоны ирдæй æвдыст æрцыд оперæ. Традицион цикл «Дебют» арæзт уыдис 14 концертæй. Проект аивадуарзджыты зонгæ кæны оперæйы æрыгон, курдиатджын солисттимæ æмæ хуынд музыканттимæ. Бацæттæ кодтой дыууæ премьерæйы «Богемæ» æмæ «Любовный напиток». Сты уарзондзинады тыххæй, иу сæ кæны адæймаджы хъысмæтмæ цымыдисдзинад, цард равдыстой алывæрсыгæй — йæ хъæлдзæгдзинæдтимæ æмæ æнкъард цаутимæ. Премьерæтæ аивадуарзджыты размæ сæ рахастой концертты хуызы. Ахæм куыст артисттæн уыдис æнахуыр фæлтæрддзинад.
Михаил Павловæн ацы сезон æрттывта ирд ахорæнтæй — фыццаг хатт ын йæ курдиат равдисын бантыст Мариинаг театры историон сценæйы Санкт-Петербурджы ахæм егъау оперон постановкæты куыд «Война и мир» æмæ «Евгений Онегин», стæй Игорь Стравинскийы номыл ног камерон залы, Гергиты Ларисæ-иу сæрмагонд уазджытæн цы сфæлдыстадон изæртæ арæзта, уым. 9-æм сыф легендарон сси балетæн дæр. Дунейы фыццаг хатт ам равдыстой постановкæ Александр Дюмайы зындгонд уацмыс «Граф Монте-Кристо»-мæ гæсгæ. Сюжет бацæттæ кодтой театрæн ног хуызы: спайда кодтой нымæцон технологитæй æмæ аразгæ интеллектæй. Балет рауад уникалон — костюмтæ, декорацитæ, хореографи, артистты куыст — аивадуарзджытæ баззадысты разыйæ.
Æнтыстджын уыдис Мариинаг театры филиалы концертон залы куыст дæр. Гергиты Абысалы дирижерон дебют, Гугкаты Зауырбеджы æмæ Юрий Демидовы разамындæй оркестрты концерттæ, оперон сценæйы хуынд солисттæ, сфæлдыстадон изæрты кадæн сæрмагонд концерттæ. Ам, раздæры лютеранон кирхæйы, æдзух арæзт цыдысты историон экскурситæ. Мариинаг театры филиал радон хатт зæрдиагæй суазæг кодта артистты бæстæйы алы рæттæй æппæтуæрæсеон фестиваль «Вахтангов. Путь домой»-йы фæлгæты. Иу ныхасæй, ацы сезон уыд алывæрсыг, ирд æмæ æнтыстджын. Труппæ фæнд кæны адæмы дисы *фтауын фидæны дæр, фæлæ парахатдæрæй: юбилейы кадæн.
Мариинаг театры филиал традицимæ гæсгæ фæлладуадзыны размæ сараздзæн кадджын мадзал — симфонион музыкæйы концерт. Архайдзысты дзы оперæйы солисткæ Мария Баранкина, пианисткæ Хадижа Исрапил, стæй Мариинаг театры курдиатджын дирижер Гугкаты Зауырбег.
