Иу изæрмæ Дзæуджыхъæуы Сæрибары фæз сси интерактивон культурон тыгъдад
Уæрæсейы регионтæй æмæ Хуссар Ирыстонæй 18 дизайнеры æмæ бренды бацæттæ кодтой сæ коллекцитæ 4-æм этнокультурон фестиваль «РОН»-мæ. Иу изæрмæ Дзæуджыхъæуы Сæрибары фæз сси интерактивон культурон тыгъдад. Уæвгæ та программæйы уыдысты Нарты хъæзтытæ, стыр концерт æмæ дæсныйадæвдисæг ахуыртæ. Фестиваль арæзт æрцыд культурон хъæппæристы президентон фонды æххуысæй. Чехойты Фатимæ радзурдзæн бæстондæр.
Афтæ, адæмы раз æлыгæй райгуырынц, æнусты истори хъахъхъæнæг, зындгонд национ мигæнæнтæ. Джума Азуева у дурынгæнæг Дагестанæй. Йæ къухты рог змæлды хатдзæг – балхайраг керамикæ. Ацы рагон æрмдæсныйад фæзынд дагестайнаг хъæу Балхары. Алы куыст дæр – сылгоймаджы къухты хъарм æмæ уарзон ахаст æвдисæг. Æрмæгæн та авзæрст æрцыд, хъæумæ хæстæг цы æлыг ис, уый.
Йæ адæмы культурæйы хай равдисын Джума Азуевайæн бантыст 4-æм æппæтуæрæсеон этнофестиваль «Рон»-ы. Йемæ иумæ – иннæ уазджытæ дæр. Сæрибардзинады фæз сси интерактивон культурон тыгъдад. Этно-хъæуы сарæзтой дæсныйад æвдисæн ахуыртæ Уæрæсейы адæмты традицион æрмдæсныйады цалдæр хуызæй, аланты-ирæтты спортивон ерыстæ «Нæртон хъæзтытæ», сывæллæтты та базонгæ кодтой рагон царды уавæртимæ. Быгъуылты Аринæ фæлвæрдта æлхуыйы руаджы къуымбилæй æндах саразын.
Этникон уæлдæфæй æххæст уыдис фестивалы сценæ дæр. Адæмæн æй банкъарын кодтой Уæрæсейы алы рæттæй дизайнертæ модæйы равдысты фæлгæты. Фенæн дзы уыдис не *нæкæрон бæстæйы адæмты равзæрд æвдисæг коллекцитæ. Зæгъæм, Кæсæг-Балхъарæй дизайнер Асия Бачиева сласта йæ республикæйы зындгонд адæмты цардыл дзурæг дарæс.
Егъау дефиле-равдысты фæстæ сценæ уыдис Стъараполы æмæ Цæгат Ирыстоны музыкантты æмæ сфæлдыстадон коллективты бар. Уæрæсейы адæмты историйы цардæй æххæст композицитæ систы этнофестивалы ирд кæрон. Ацы аз йæ географи уыдис уæрæхдæр. Йæ саразджытæ, ныридæгæн сæ къухы цы бавтыд, ууыл æрлæууынмæ нæ хъавынц.
Дзæуджыхъæуы 5 бонмæ фехæлдысты дугты *хсæн арæнтæ: рагон скифаг нымæтæй – нырыккон подиумтæм. Æмæ кæд Сæрибардзинады фæзы этнофестивалы зæлтæ нал хъуысынц, уæддæр культурæйы рæзтæн бауромæн нæй. Цалынмæ алы нывæфтыды æмæ алы кафты нæ фыдæлты истори цæра, уæдмæ дугты *хсæн бастдзинад нæ фехæлдзæн.
