Мадзал арæзт æрцыд Советон Цæдисы Адæмон артисткæ, Советон Цæдисы фыццаг сылгоймаг-дирижеры 110 азы райгуырды бонмæ
Зындгонд дирижер Дудараты Вероникæйы бюст байгом кодтой Мæскуыйы консерваторийы Стыр Залы фойейы. Мадзал арæзт æрцыд Советон Цæдисы Адæмон артисткæ, Советон Цæдисы фыццаг сылгоймаг-дирижеры 110 азы райгуырды бонмæ. Кадджын уазджыты *хсæн – маэстро Гергиты Валерий, Цæгат Ирыстоны раздæры президент, политик Дзасохты Алыксандр. Бæстондæр хабæрттæ радзурдзæн Чехойты Фатимæ.
Йæ ном хаст æрцыд дунейы музыкалон аивады историмæ. Ныр та йæ сæнусон кодтой Мæскуыйы Петр Чайковскийы номыл паддзахадон консерваторийы. Стыр залы фойейы байгом 20-æм æнусы зындгонд дирижер Дудараты Вероникæйы бюст. Ацы цау æрцыд йæ юбилейон аз – декабры йæ райгуырдыл æххæст кæны 110 азы. Кадджын мадзалы архайдтой Уæлрадон æмæ Æххæстбарджын минæвар, Цæгат Ирыстоны раздæры президент Дзасохты Алыксандр, Мариинаг æмæ Стыр театрты разамонæг Гергиты Валерий, Мæскуыйы консерваторийы ректор Александр Соколов, культурæйы архайджытæ, Дудараты Вероникæйы курдиатæн аргъгæнджытæ.
Цыртдзæвæны автор у Цæгат Ирыстоны адæмон нывгæнæг, Уæрæсейы аивæдты Академийы академик Соскъиты Владимир. Бюст æвæрд æрцыд Мæскуыйы консерваторийы музыкалон классикты историон галерейы, сæ нæмттæ рагæй бæстæйы культурæйы историйы хай чи сси, уыцы зындгонд адæмты бюстты фарсмæ.
Дудараты Вероникæ райгуырд Бакуйы, музыкæмæ уарзондзинад хъомылады хай кæм уыдис, ахæм ирон бинонты хæдзары. Æвзонг чызгæй ахуыр кæнын райдыдта курдиатджын сывæллæтты музыкалон скъолайы, уый фæстæ зонындзинæдтæ исынмæ ацыд Ленинградмæ, каст фæцис Мæскуыйы консерватори дæр. Уыцы рæстæг дирижер нымад уыдис нæлгоймæгты дæсныйадыл. Дудараты Вероникæйæн, бæстæйы историйы фыццаг сылгоймæг-дирижерæн, бантыст æрмæст симфонион оркестры хай суæвын нæ, фæлæ æнæхъæн дунейæн равдыста æрдзон курдиатæн арæнтæ кæй нæй, уый.
Æнусы *рдæджы бæрц Дудараты Вероникæ разамынд лæвæртта бæстæйы стырдæр симфонион коллективтæн. Уый та у Гиннесы сгуыхтдзинæдты чиныгмæ хаст æнтыстдзинад. Йæ разамындæй фыццаг хатт азæлыдысты æмæ фыст æрцыдысты Георгий Свиридовы, Арам Хачатуряны, Родион Щедрины, Альфред Шниткейы, Микаэл Таривердиевы æмæ æндæр композиторты уацмыстæ. Дудараты Вероникæ арф æнкъардта музыкæ, куыста рæстæджы зындгонддæр автортимæ.
Йæ ном хæссы космосы стъалытæй иу. «Æфсæйнаг Вероникæ», » Цæхæрдзаст дирижер», «БИСты королевæ»… Уыцы эпитеттæ уыдысты йæ куыстмæ æмæ музыкæмæ уарзондзинад æвдисæг. Йæ хъус ахста чысыл æнæраст зæл дæр, алы репетицийы дæр æй фæндыд оркестримæ иттæг хорз куыст равдисын, алы уацмыс дæр-иу айста йæ зæрдæмæ. Музыканттæн йæ къухы иу фезмæлд дæр уыд цавæрфæнды ныхасæй бæлвырддæр, домаг кæй уыдис, уымæй та æвдыста аивадмæ иузæрдыгдзинад.
Дудараты Вероникæйы юбилейон аз дирижеримæ баст мысинæгтæн ис стыр нысаниуæг. Мæскуыйы консерваторийы дирижеры бюст æрмæст кад кæнынæн æвæрд не *рцыд. Уыдис дæсныйадмæ ахаст ивæг æмæ бæстæйы музыкалон аивадмæ ногдзинæдтæ хæссæг адæймаджы æнтыстдзинæдтæн аргъ кæныны мадзал. Ирыстонæн баззайдзæн, йæ ном æнустæм дунейы культурæйы историмæ хаст кæмæн æрцыд, ахæм курдиатджын адæймагæй.
