Адæмон нывгæнæг Соскъиты Владимиры скульптурæтæ радон хатт дисы бафтыдтой аивадуарзджыты
Дзæуджыхъæуы аивад æмдзу кæны фистæгæйцæуджытимæ. Ам адæймаг зæрдæйæ æнкъары удыхъæды хърам ахаст. Тугъанты Махарбеджы номыл музейы байгом егъау проект «Восхождение». Адæмон нывгæнæг Соскъиты Владимиры скульптурæтæ радон хатт дисы бафтыдтой аивадуарзджыты. Хъайтартæй иутæ бынат ссардтой Сабырдзинады проспекты. Дзæуджыхъæу «Восхождени»-йыл куыд сæмбæлд, уый тыххæй радзурдзæн Чехойты Фатимæ.
Проект «Восхождение»-йы фæндаг – Мæскуыйæ-Дзæуджыхъæумæ. Равдыст райдыдта 30-æм июлы бæстæйы сæйраг горæты Надежда Брыкинайы галерейы – советон неофицалон аивады стырдæр хи æмбырдгонды. Дыууæ къуырийы фæстæ экспозици байгом Дзæуджыхъæуы. Куратортæ йæ æрмæст маршруты кæройнаг бынатыл нæ нымайынц, фæлæ æнæхъæн проекты ахсджиаг хъуыдыйыл. Ам, Тугъанты Махарбеджы номыл музейы залты фембæлдысты бæстæйы аивады дыууæ хуызы: Соскъиты Владимиры скульптурæ æмæ 20-æм æнусы дыккаг æрдæджы нонконформистты нывкæнынад.
Экспозицийы – Соскъиты Владимиры скульптурæтæ. Нывгæнæг бронзæйæн идеалон хуыз барæй нæ ратты. Бæрæг дарынц æрмæст уæлæнгай æндзæвд – дæрзæг æмæ æнæраст, стæй къухты фæндтæ. Скульптор уый хоны «сывæллоны æмбарынад» – дзаумайы мидис банкъарын, йæ хуымæтæгдзинад ын нæ фесафгæйæ. Уыцы фæнд æххæстгонд цæуы Марлен Шпиндлеры нывкæнынады дæрзæг четæныл – дыууæ нывгæнæджы дæр фактурæ не *мбæхсынц, æрмæджы ныууадзынц сæ фæд.
Проекты номæн цы куыст равзæрстой, уыцы скульптурæ «Восхождение». Дзуры змæлды тыххæй, рухсмæ фæндаг тыхархайд кæй домы, æмæ уыцы тыхархайд уæлахиз кæй у, ууыл. Скульптурон экспозицийы хай æрбынат кодта Сабырдзинады проспекты. Кадджын æркасты бæсты – æнæнхъæлæджы сыхæгтæ.
Соскъиты Владимиры скульптурæтæ уынджы хуымæтæджы æвæрд не сты – систы æрвылбоны царды хай. Сæ фæрсты адæм цæуынц куыстмæ, æрлæууынц сæ сывæллæттимæ, лæмбынæг сæм фæкæсынц. Скульптурæ сси цæрджытимæ ныхасгæнæг. Равдыст «Восхождение» аивад здахы адæймагмæ. Æвдисы, культурæ цæры, адæм кæм цæрынц, уым. Фенæн æй ис Аивадон музейы залты 25-æм октябрмæ. Æмæ Сабырдзинады проспекты ауайгæйæ, бронзæйæ конд хъайтартæ Дзæуджыхъæуы царды хай кæм систы, уым.
