Театрдзаутæ фендзысты 4 постановкæйы: «Ученик колдуна», «Гамлет», «Онегин» æмæ «Обломов
Дзæуджыхъæуы райдыдтой Лев Толстойы номыл Липецкы паддзахадон академион театры гастрольтæ. Театрдзаутæ фендзысты 4 постановкæйы: «Ученик колдуна», «Гамлет», «Онегин» æмæ «Обломов». Æппæт спектакльтæ æвдыст цæуынц Тæбæхсæуты Балойы номыл Ирон академион театры сценæйы. Фыццаг уал Ирыстоны аивадуарзджытæн равдыстой спектакль «Ученик колдуна». Бæлвырддæр хабæрттæ радзурдзæн Чехойты Фатимæ.
Сæйраг хъайтар Крабат, æнæхæдзар уæвгæйæ, сфæнд кодта иу бонмæ йæ хъысмæт аивын, нал æй фæнды мæгуыргур уæвын. Хæлæрттæ йæ не *мбарынц, худынц ыл, хуымæтæг фырмæгуыр лæппу куыст кæм хъуамæ ссара? Кæд, миййаг, зæронд куыройы.
Æмæ Крабат нæ фæтарст: кæм куса, уый йын уæлдай нæу. Уымæ гæсгæ араст къуылдыммæ. Кæцæй æнхъæл уыдис, уым кæуыл фембæлдзæн, уый.
Æцæгæйдæр ацы цæрджытæ кæддæр уыдысты хуымæтæг адæм, фæлæ сæ, бирæ азты дæргъы ам кусгæйæ, рауад куклатæ. Уыцы метафорæ æвдисы, хингæнджыты митæ адæмы хъару куыд асастой, уый. Крабат тæрсгæ дæр кæны, фæлæ не *мбары, ардыгæй куыд нæ алидзынц, уый. Æмæ йын уæд йæ ног хæлар Тондо сфæнд кодта æппæт сусæгдзинæдтæ раргом кæнын.
Æмæ афтæ зыны, цыма Крабаты хъысмæт дæр бæрæггонд у, фæлæ лæппу фембæлд, уарзон ын чи сси, ахæм адæймагыл.
Афæдзы фæстæ йæхæдæг дæр сси ахст кукла, фæлæ зоны йæхи æмæ йæ хæлæртты куыд ссæрибар кæна, уый. Æрмæст æцæг уарзондзинадæн йæ бон у куклаты сæ хъадамандæй суæгъд кæнын, куырой фехалын æмæ хингæнæджы амарын. Чызг хъуамæ иннæты астæу базона Крабаты, фæлæ уый хуымæтæг хъуыддаг нæу. Кусджытæ райстой халæтты хуыз, чызгæн та бабастой йæ цæстытæ. Фæлæ уæддæр уарзондзинад фæуæлахиз. Липецкы æмæ Цæгат Ирыстоны театртæ æмгуыстад кæнынц афæдз. Ирон артисттæ Липецкы равдыстой спектакль «Король Лир». Уæд равзæрдысты хæлар ахастытæ. Лев Толстойы номыл театры балц Ирыстонмæ рауад Æппæтуæрæсеон программæ «Стыр гастрольты» фæлгæты. Дзæуджыхъæуккаг аивадуарзджытæ ма «Ученик колдуна»-йæ уæлдай фендзысты спектакльтæ «Гамлет», «Евгений Онегин» æмæ «Обломов». Уыдон сты театры репертуары хуыздæр постановкæтæ. Уæлдай цымыдисагдæр уыдзæн «Гамлет», зæгъы театры директор Юрий Итин.
Кæрæдзийы фæлтæрддзинадимæ зонгæ кæнын ахсджиаг у, зæгъы Ирон театры аивадон разамонæг Уалыты Гиви. Ам фыццаг хатт не суазæг кодтой æндæр горæтты постановкæтæ æмæ культурæ.
Спектакль «Ученик колдуна» театрдзаутæ бирæ азты сæ зæрдæты дардзысты. Ныр та уал, æнæмæнг, æнхъæлмæ кæсынц ног постановкæтæм.
Тагъд рæстæг Ирон театр нысан кæны дзуапдæттæн гастрольтæ саразын. Равдисдзысты постановкæтæ — «Гæздæнтæ», «Отелло», «В списках не значился» æмæ «Он, он, окно, покойник».
