Дзæуджыхъæуы коллектив архайдта концертон программæйы «Мы — Россия» иу сценæйы паддзахадон академион национ кафты ансамбль «Алан»-имæ
Цæгат Ирыстоны ацыдысты паддзахадон академион ансамбль «Донбасс»-ы гастрольтæ. Дзæуджыхъæуы коллектив архайдта концертон программæйы «Мы — Россия» иу сценæйы паддзахадон академион национ кафты ансамбль «Алан»-имæ. Программæмæ хаст æрцыдысты, бæстæйы адæмты культурон традицитимæ чи зонгæ кæны, ахæм уацмыстæ. Бæстондæр радзурдзæн Чехойты Фатимæ.
Кавказы хæхты улæфт славайнаг хъæдты сыфтæрты зарæггæнаг уынæримæ куы фембæлы, уæд дзы рауайы уникалон симфони. Фæсивæды галуаны сценæйы зæлы сæдæгай аивадуарзджытæн. Балæвар æй кодтой Сгуыхт паддзахадон академион кафты æмæ зарæджы ансамбль «Донбасс» æмæ паддзахадон академион национ кафты ансамбль «Алан».
Ансамбль «Донбасс» Цæгат Ирыстонмæ ссыдис Донецкы адæмон республикæйæ. Артисттæ ам фыццаг хатт не сты, уыдонæн ацы гастрольтæ — стыр бæрæгбон. Ансамблы вокалист Анатолий Миняйлойы курдиатимæ 2022-æм азы базонгæ сты Дзæуджыхъæуы æмæ Беслæны цæрджытæ. Ныр дæр та зæрдиагæй ссыд рсепубликæмæ.
Анатолий Миняйло театрдзауты размæ рахаста уырыссаг адæмон зарæг «Выйду на улицу» Советон Цæдисы адæмон артист Леонид Сметанниковы интерпретацийы.
Ансамблы программæ уыдис алывæрсыг. Театрдзауты базонгæ кодта уырыссаг, белоруссаг, молдавайнаг, тæтæйраг æмæ грекъаг культурæтимæ. Коллектив республикæмæ ссыдис Уæрæсейы культурæйы министрады æппæтуæрæсеон гастролон-концертон пъланмæ гæсгæ.
Ацы туры коллектив ратдзæн концерттæ Елхоты, æрыдоны æмæ Цыколайы. Ансамбль «Алан»-æн хæлардзинады ахæм концерттæн ис стыр нысаниуæг. Артисттæ куыд гастрольты, афтæ ам дæр, æндæр коллективты æхсызгонæй фæзонгæ кæнынц сæ фæлтæрддзинадимæ, стæй райсынц иннæты фæлтæрддзинад дæр, архайынц культурон бастдзинæдтæ фидар кæныныл.
Ансамбль «Донбасс» схорзæхджын кодтой Цæгат Ирыстоны Парламенты æмæ культурæйы министрады Кады гæххæттытæй.
Хуымæтæг концерт нæ уыдис, фæлæ хъысмæттæ иугæнæг. æмæ цалынмæ ахæм ритмтæ цæрынц, уæдмæ аивады æгæрон тыхæй æххæст дыууæ регионы *хсæн фидар кæндзысты бастдзинæдтæ.
