Уазджытæ уыдысты ахуырады æмæ наукæйы министрады минæвæрттæ, республикæйы скъолаты хистæркъласонтæ. æдæппæтæй 200 адæймагæй фылдæр
Цæгат Ирыстоны педагогон колледжы æмæ Дзæуджыхъæуы электроникæйы колледжы уыд гом дуæртты иумæйаг бон. Уазджытæ уыдысты ахуырады æмæ наукæйы министрады минæвæрттæ, республикæйы скъолаты хистæркъласонтæ. æдæппæтæй 200 адæймагæй фылдæр. Ахуыргæнæндæтты педагогтæ скодтой дæсныйадæвдисæг ахуыртæ, рæзгæ фæлтæры базонгæ кодтой колледжты ахуырадон процессимæ. Бæлвырддæр хабæрттæ радзурдзæн Хъайтмазты Дзерассæ.
Интерактивон технологитæ ам ахуыртæм уæлæмхасæн фæрæз не сты. Нырма ахуыры рæстæг фидæны педагогтæ ахуыр кæнынц семæ кусын. Регина Калашникова у 4-æм курсы студенткæ, фæлæ ныр 2 мæйы кусы хъомылгæнæгæй сывæллæтты рæвдауæндоны. Йæ дæсныйад нырма скъолайы равзæрста.
Хицæн лаборатори баст у, æппæтæй кæстæр сабиты физкультурон-дзæбæхгæнæн архайдимæ. Ам фидæны хъомылгæнджытæ зонгæ кæнынц, сывæллæтты активон уæвынмæ цы ифтонггæрзтæ разæнгард кæнынц, уыдонимæ. Зæгъæм, сæрмагонд степ-платформæйæ пайда кæнынц координацийæн.
Цалцæггонд аудиториты гæнæнтæн аргъ скодтой хуынд скъоладзаутæ дæр. Гом дуæртты иумæйаг боны педагогон колледж бабæрæг кодтой 200 адæймагæй фылдæр. Фидæны абитуриентты базонгæ кодтой 6 лабораторийы æмæ 2 æрмадзы куыстимæ. Студенттæ дзы ахуыр кæнынц ахуырады æмæ хъомыл кæныны нырыккон методтыл.
Педагогикæйæ бæрзонд технологитæм. Скъоладзаутæн йæ дуæрттæ байгом кодта Дзæуджыхъæуы электроникæйы колледж дæр. Ам хи афæлварын ис электрон ифтонггæрзтимæ куысты. 6-æмкъласон Артем Селиверстов дæр базонгæ ацы кусæнгæрзтимæ. Ацы хъуыддаг ын тынг цымыдисаг разынд.
Иннæ аудиторийы скъоладзаутæ зонгæ кæнынц 3Д технологитимæ. Сæрмагонд принтерыл нымæцон проекттæй рауайы æцæг предметтæ. Архайджытæн равдыстой, программæ куыд кусы, уый æмæ сын радтой, ахæм хуызы мыхуыры хи афæлварыны фадат.
Дæсныйæдтимæ практикон хуызы зонгæ кæнын у астæуккаг профессионалон ахуырады системæйы ахсджиаг хай. Цæгат Ирыстоны ахуырады æмæ наукæйы министры хæдивæг Габеты Вадим куыд загъта, афтæмæй абон республикæйы 9-æм кълæсты рауагъдонты 65 проценты онг æвзарынц колледжтæ æмæ техникумтæ.
Гом дуæртты иумæйаг бон скъоладзаутæн ахсджиаг у. Сæ бон у рагагъоммæ фенын, колледжты куыд ахуыр кæнынц, алы къабæзты хи афæлварын æмæ бамбарын, цавæр дæсныйад сын уыдзæн цымыдисаг, уый.
