Баиу кодта суворовонты æмæ кадетты
Дзæуджыхъæуы цæуы театралон фестиваль «Искусство побеждать». Баиу кодта суворовонты æмæ кадетты. Архайджытæ бацæттæ кодтой, Фыдыбæстæйы Стыр хæсты темæимæ баст постановкæтæ. Æртæ бонмæ равдисдзысты лæгдзинады, патриотизмы æмæ номарæны темæйыл дæсгай спектакльтæ. Хуыздæр коллективтæн та фадат уыдзæн Мæскуыйы финалы архайынæн. Бæстондæр радзурдзæн Чехойты Фатимæ.
Фыдыбæстæйы Стыр хæсты æфсæддоны дарæс æмæ ивгъуыд æнусы чингуытæ Цæгат Кавказы суворовон æфсæддон училищæйы музейæ хуымæтæджы нæ рахастой. Театралон фестиваль «Искусство побеждать»-ы фыццаг къæпхæнмæ бындурон цæттæ кодтой. Челдыты Алыксандр бакуыста моноспектаклыл. Радзырдта Фыдыбæстæйы Стыр хæсты ветеран Кокайты Саламджерийы сгуыхтдзинады тыххæй.
Ацы аз Хуссар æфсæддон зылды Уæрæсейы хъахъхъæнынады министрады уæлдæр ахуырады агъоммæйы организацитæй уæлдай фестивалы архайынц республикæйы 4 кадетон къласы. Бацæттæ кодтой театралон постановкæтæ. 3 боны дæргъы равдисдзысты 10 спектаклы. Данила Ефремовы номыл Аксайы хъазахъхъаг кадетон корпусы кад хъахъхъынæн Ирыстонмæ ссыдис 8 адæймагæй арæзт командæ.
Чи фæхæрд уа, ахæмтæ ам нæ уыдзæн — жюри 10 номинацийы уæлахиздзауты сбæрæг кæныны тыххæй бæстон æркæсдзæн алы коллективы цæттæдзинадмæ дæр. Равзардзысты хуыздæрты — Мæскуыйы финалы архайынмæ.
Фестивалы сæйраг нысан ныридæгæн дæр бæлвырд у — цалынмæ хъæбатырты нæмттæ ног фæлтæртæ хъуыды кæнынц, уæдмæ семæ баст мысинæгтæ рох нæ уыдзысты.
