Стыр æвæрæн бахаста республикæйы журналистикæйы райрæзтмæ
10 азы рацыд зындгонд журналист Доййаты Олег, йæ цардæй куы ахицæн, уæдæй. Стыр æвæрæн бахаста республикæйы журналистикæйы райрæзтмæ. Уыд нæ телекомпанийы информацион службæйы бырдурæвæрджытæй иу. Уарзта поэзи æмæ футбол. Уыд æфсармджын, фæлæ уыимæ ныфсхаст адæймаг, цыргъзонд æмæ курдиатджын. Уыд бирæ телевизион проектты автор. Схъомыл кодта цалдæр фæлтæры журналистты. Абон сæ дæсны ахуыргæнæджы хъуыддаг дарддæр хæццæ кæнынц, цы зонындзинæдтæ сын лæвар кодта, уыдонæй пайдагæнгæйæ. Бæлвырддæр на дарддæры æрмæджы.
Кæддæриддæр уыд æппæтæй ахсджиагдæр цауты тæккæ астæу. Саста информацион блокадæ гуырдзиаг-хуссарирыстойнаг быцæуы рæстæг 91-æм азы. Ам, Цæгаты, дзырдта 92-æм азы фæззæджы цауты тыххæй. Нæмгуытæй нæ тарстис, йæ сæйраг хæцæнгæрзтæ та ацы хъуыддаджы уыдысты микрофон æмæ камерæ. Доййаты Оледжы номимæ баст у ирон тележурналистикæйы æнæхъæн дуг. Уымæй райдыдта Цæгат Ирыстоны информацион службæйы куыст. Профессионалон дæсныдзинады дуне байгом кодта дæсгай журналисттæн. Абон уыдон хъарм зæрдæйæ мысынц сæ ахуыргæнæджы. Йæ иу дзырд «бæззы» – уыд æрмæджы хæрзхъæддзинады нысан. Ахæм бæрæггæнæн фехъусын уыд алы райдайгæ уацхæссæджы бæллиц. Се *хсæн уыд Хъулаты Юрий дæр.
Доййаты Олег уыд стыр дамгъæйæ адæймаг æмæ профессионал. Уыд информацион службæйы разамонæг, дæнцæг æмæ æцæг хæлар алы кусæгæн дæр. Ахæмæй йæ бахъуыды кодта Моргуаты Ладæ. Доййаты Олег ын сси, журналистикæмæ йын фæндаг чи срухс кодта, ахæм цырагъ. Ладæ куыд зæгъы, афтæмæй фæлтæрдджын журналист никуы домдта уацхæсджытæй сæ текстытæ рафыссын. Зыдта раст сæвæрын акценттæ, æмæ цæттæ æрмæгмæ иу дзырд бафтаугæйæ дæр æй цымыдисагдæр скæнын. Уыимæ авторæн лæвæрдта хи стильмæ гæсгæ фыссыны бар.
Хуымæтæг, рæстдзæвин æмæ алкæмæндæр æмбаргæ. Ахæм æнæивгæ æгъдæуттæм гæсгæ йæ куыст арæзта Доййаты Олег. Йе стыр профессионалон фæндаг та райдыдта газет «Молодой коммунист»-æй. Уым Доййаты Олег кодта фыццаг къахдзæфтæ куыд спортивон журналист. Дарддæр – фылдæр. Баскаты Уырызмæгимæ куыста республикæйы спортивон мадзæлтты. Футбол, хабæртты фæстæ, уыд йæ дыккаг уарзондæр хъуыддаг.
Доййаты Оледжы фæллойадон биографийы чысыл куысты бынæттæ нæй. Фæлæ уæддæр сæйрагдæр уыд информацион службæйы архайд. Сæ иумæйаг куысты тыххæй бирæ мысинæгтæ баззад телеоператор Юрий Жирнякмæ.
Бирæ азты фæстæ дæр Доййаты Олег рох нæу йе *мкусджытæй, æмæ йын йæ курдиатæн аргъ чи кодта, уыдонæй. Ирон журналистикæмæ цы стыр æвæрæн бахаста, уымæн æмбæлгæ аргъ скæнын зын у.
