Хъæутæм цы ахуыргæнджытæ ацæуынц кусынмæ, уыдонæн канд ног куыст æмæ цæрæнбынат нæ фæзыны, фæлæ ма сæ схорзæхджын кæнынц иу милуан сомæй дæр
2020-æм азы Уæрæсейы йæ тыхы бацыд президентон программæ «Хъæуккаг ахуыргæнæг». Хъæутæм цы ахуыргæнджытæ ацæуынц кусынмæ, уыдонæн канд ног куыст æмæ цæрæнбынат нæ фæзыны, фæлæ ма сæ схорзæхджын кæнынц иу милуан сомæй дæр. Программæ цы ахуыргæнджытæн баххуыс кодта, уыдоны тыххæй радзурдзæн Тъехты Элинæ.
Андиаты Маргаритæ ныр студенттимæ нал, фæлæ скъоладзаутимæ кусы. Институты куыст раивта скъолайы уроктыл. Йæ царды ахæм ивддзинæдтæ æрцыд программæ «Хъæуккаг ахуыргæнæджы» фæлгæты. Скъоладзаутимæ кусы 3-аг аз. Фæлæ куыд зæгъы, афтæмæй куысты рæстæг бирæ зындзинæдтæ сæвзæры.
Маргаритæ зæрдиагæй ахуыр кæны йæ дæсныйады ног фæзилæнтæ æмæ кад кæны скъолайы ахуыргæнджытæн. Ныр, йæхæдæг куы банкъардта, скъоладзауимæ кусын æнцон кæй нæу, уый, уæд ахуыргæнджыты схуыдта æцæг хъайтартæ. Уымæн æмæ хуымæтæг урочытæ нæ фæкæнынц, фæлæ алы сывæллонæн дæр балæвар кæнынц сæ уды хъарм. Æмæ Маргаритæйæн йæ фæллойы хуыздæр хæрзиуæг у, сывæллон хъуыдыйаг англисаг æвзагмæ раст куы ратæлмац кæны, уый.
Дриаты Марат ахуыргæнæджы дæсныйад бауарзта, скъолайы ма куы ахуыр кодта, уæд, йæ физикæйы ахуыргæнæджы руаджы. Йæ уарзон зондамонæджы фæндагыл ацæугæйæ, ахуыр кæнын райдыдта уыцы наукæ. 2021-æм азы Марат архайдта программæ «Хъæуккаг ахуыргæнæджы», æмæ ныр физикæ дæтты Мæздæджы скъолайы ахуырдзаутæн.
Программæ царды рауагътой 2020-æм азы. Æмæ уыцы рæстæгмæ ног куысты бынæттæ фæзынд 43 ахуыргæнæгæн. Фарон конкурсы æвзарæн къæпхæн ацыдысты 13 адæймаджы. Уыдон – уырыссаг æвзаджы, математикæйы, физикæйы æмæ химийы ахуыргæнджытæ. Къуыри 18 сахатæй къаддæр нæ кусынц. Ацы аз та курдиæттæ бадæттæн ис 1-æм апрелы онг.
Программæйы архайыны фадат ис дипломтæ кæмæ ис, æмæ 50 азы онг кæуыл цæуы, уыдонæн. Республикæйы ахуырады æмæ наукæйы министрад конкурсы æвзарæн къæпхæны уæлахиздзаутимæ бадзырд бафыссы 5 азы æмгъуыдмæ. Ацы аз 5 ахуыргæнæгæн сæ бон у программæйы архайджытæ суæвын. Хъæутæм цы ахуыргæнджытæ ацæуынц, уыдоны схорзæхджын кæнынц 1 милуан сомæй.
