Кафæн аивады легендæ сын скодта дæсныйадæвдисæг ахуыртæ
70 æвзонг кафæгæй фылдæр базонгæ сты Уæрæсейы сгуыхт артист Плиты Нодаримæ æмæ йæ уникалон хореографиимæ. Кафæн аивады легендæ сын скодта дæсныйадæвдисæг ахуыртæ. Радзырдта, йе сфæлдыстадон фæндаджы тыххæй, фыццаг къахдзæфтæ чи кæны, уыцы артисттæн раргом кодта йæ курдиаты сусæгдзинæдтæ. Национ кæфтыты хицæндзинæдты тыххæй рæзгæ фæлтæрæн радзырдта адæмон сфæлдыстады хæдзары хореографион жанры раззагдæр специалист Цориты Мæдинæ дæр. Фембæлды сæйраг нысан уыд хихъæппæрисадон къордтæн алывæрсыг æххуыс бакæнын.
Плиты Нодар, Уæрæсейы сгуыхт артист, Цæгат æмæ Хуссар Ирыстоны адæмон артист: «Сæ цæрæнбон бирæ уæд. Ай хорз хъуыддаг у. Уый у спорт. Уый у æнæниздзинад. Ам рæзы сæры зонд. Æнæхъæн дунейыл æрзылдтæн иу æмæ дыууæ хатты нæ, фæлæ дæсгай хатты, æмæ сын мæ цæст уый уарзы, цæмæй уыдон дæр Дзæуджыхъæуæй дарддæр ацæуой, æмæ феной цард куыд у, уый. Смартфоны æмæ интернеты нæ, фæлæ сæхи цæстæй феной».
Лалыты Хъазыбег, РЦИ-А культурæйы сгуыхт кусæг, республикæйы адæмон сфæлдыстады хæдзары директор: «Адæмон сфæлдыстады авналæнтæ æгæрон сты. Ис нæм коллективтæ районты, хъæуты. Адæмон сфæлдыстады хæдзары бавнæлдтам ноябры, æмæ хъуамæ æрзилæм ахæм сфæлыдстадон фембæлдтимæ. Чи басгуыхт алыхуызон жанрты, уыдон фембæлдтытæ кæнынц коллективтимæ».