Иттæг хорз цæгъды фортепианойыл
Æвзонг курдиат. 8 аздзыд пианист Мæрзойты Соломон фæндаг ссардта классикон аивадуарзджыты зæрдæмæ. Иттæг хорз цæгъды фортепианойыл. Музыкалон скъолайы 3 ахуыры азмæ йæ къухы бафтыд цалдæр кады гæххæтты æмæ дипломы. Сси алыхуызон конкурсты лауреат. Æрæджы та сси Лолаты Заремæйы номыл æвзонг пианистты конкурсы Гран-прийы аккаг. Æрыгон музыканты тыххæй бæлвырддæр радзурдзæн Фидараты Маринæ.
Лæмбынæг цæстæнгас, æмæ æххæстæй дæхи банкъарыс процессы. Мæрзойты Соломонæн фортепианойыл цæгъдын у йæ уарзондæр куыст. Музыкалон скъолайы канд хуымæтæг ахуыр схонæн нæй. 3 азмæ бирæ цæуылдæрты сахуыр ис. Фыццаджыдæр, зæгъæн ис, æмæ иттæг хорз базыдта ацы муызкалон инструмент. Йæ репертуары сты дунейы зындгонд классикты уацмыстæ. Соломоны цагъд дисы фтауы алы кары аивадуарзджыты дæр. Уымæн æмæ фортепиано банкъардта йæ миддунейы арфæй.
Музыкалон скъолайæ райдайы курдиатджын сывæллæтты сфæлдыстадон цардвæндаг. Базонгæ вæййынц бæрзонд аивады дунеимæ. Ногдзинæдтæ базонын æмæ аивадон бæрзæндтæм схизын та сын æххуыс кæнынц фæлтæрдджын педагогтæ. Уыимæ сын канд педагогтæ не сты, фæлæ ма дæсны æмæ зондамонæг разамонджытæ дæр. Уымæн æмæ æрмæст ахуырадон программæйыл не рлæууынц. Арæх фæпайда кæнынц алыхуызон цымыдисаг мадзæлттæй, цæмæй сывæллæттæ тырной фылдæр фæлтæрддзинад райсынмæ.
Кæстæртæн се рдзон курдиат раргом кæнын, æнцон хъуыддаг нæу. Фæлæ уымæй зындæр та у курдиатджын сабийæ æцæг профессионал схъомыл кæнын. Таматы Зæринæйæн курдиатджын сывæллæттимæ æнцон кусын у. Уымæн æмæ йæ бæлвырд зоны, куыд фæзæгъынц, кæуыл æмæ цæуыл æрхæцын хъæуы, уый. Зæгъæм, Зæринæ æппæтæй ахсджиагдæрыл нымайы ныййарджытимæ æмархайд. Цыфæнды уацмысыл дæр хъæуы æнæрлæугæйæ кусын. Афтæмæй профессионалон æууæлтæ кæндзысты фидардæр. Уымæ гæсгæ сыл кусын хъæуы хæдзары дæр.
Мæрзойты Соломоны цагъд фæндаг ссардта бирæ зæрдæтæм. Уæдæ хуыздæрыл нымад æрцыд цалдæр сфæлдыстадон конкурсы. Пианист ма суанг сæмбырд кодта æнæхъæн папкæ йæ кады гæххæттытимæ æмæ дипломтимæ. Йæ курдиатæн ын стыр аргъ скодтой ацы хатт дæр. Архайдта Лолаты Заремæйы номыл æвзонг пианистты конкурсы. Æмæ дыккаг хатт бахъахъхъæдта хуыздæр конкурсанты ном. Афтæмæй та фидарæй зæрдæ дарæн ис Соломоны стыр сфæлдыстадон фидæныл.
