Цæгат Кавказы кинохроникæйы студийы 30 азы куыстмæ бацæттæ кодта 100 сюжетæй фылдæр киножурнал «Северный Кавказ»-æн
Поэт, публицист, кинодокументалист… 85 сæххæст Цæгат Ирыстоны аивæдты сгуыхт архайæг, Хетæгкаты Къостайы номыл премийы лауреат Гуыдиаты Гермæны райгуырдыл. Уыд 20 документалон кинолентæйы автор. Уымæй дарддæр систа 100 сюжетæй фылдæр, сæрмагондæй журнал «Северный Кавказ»-æн. Бæлвырд, æргом, æмæ базонæн кæй ис, ахæм миниуджытæй хицæн кодта йæ поэзи, публицистикæ æмæ режиссурæ. Гуыдиаты Гермæн кæддæриддæр æргом кодта йæхи цæстæнгас. Куыд царды, афтæ сфæлдыстады дæр. Уыд ирд æмæ хæдбар адæймаг. Бæстондæр радзурдзæн Фидараты Маринæ.
Рухс. Камерæ. Мотор. Йæ дæсныйад Гуыдиаты Гермæн равзæрста уарзгæйæ. Курдиатджын режиссер-документалист. Сфæлдыстадмæ фæндаг уыд даргъ æмæ зын. Æрыгон уæвгæйæ, Гуыдиаты Гермæн хъуыды кодта, йæ цард нæлгоймаджы æцæг дæсныйадимæ кæй сбæтдзæн, уый. 14 азы йыл куы цыди, уæд бацыд заводмæ электрикæй чысыл куыстытæ кæнынмæ. Фæстæдæр та ахуыр кæнынмæ бацыд Цæгат Кавказы хæххон металлургон институтмæ. Фæлæ уæддæр йæ зæрдæ агуырдта æндæр цыдæр. 1960-йæм азы абалц кодта Мæскуымæ, кинематографийы Æппæтуæрæсеон паддзахадон институтмæ. Йæ разамонæг уыд советон кинорежиссер Роман Кармен. Зындгонд уыд йе фсæддон документалон кинолентæтæй.
Райдайгæ кинематографист Гуыдиаты Гермæны кинонывы фыццаг уæлахиз. Йæ дипломон куыст «Еще раз вперед» рамбылдта приз Ереваны кинофестивалы.
Йе рмдзæф бæрæг дары алы ран дæр. Уымæн æмæ-иу йæ алы куысты дæр бавæрдта йæ уд. Ахсджиаг ын уыд алы обрæз дæр бæлвырд равдисын. Ирд æмæ хæдбар адæймагмæ уыд разамонæджы миниуджытæ.
Сфæлдыстады та уыд ныфсхаст. Йæ хъуыдымæ гæсгæ, хъуамæ алчидæр йæ куыст кæна хæрзхъæд. Йæхæдæг дæр ам уыд дæнцæгæн хæссинаг.
Гуыдиаты Гермæн йæ кинонывтыл зæрдиагæй куыста. Æрмæг бæстон æмбырд кæнгæйæ арæзта шедевртæ. Кинематографист йæ куыстытæ иста зындгонд архайджыты номыл. Уыимæ уæлдай нæ уыд аразæг у, кæнæ нывгæнæг.
Йæ кинолентæты хсæн: «Хетæгкаты Къоста», «Хетæг», «Портрет без багета», «Композици», «Но больше всех люблю», «Жизнь в седле», «Альбом Хроникера»…
Гуыдиаты Германы æрмæст режиссерæй нæ зонынц. У 4 поэтикон æмбырдгонды, уацты, рецензиты автор. Уымæй дарддæр очеркты æмбырдгонд «Вершины». Ацы куысты тыххæй йын саккаг кодтой Хетæгкаты Къостайы номыл паддзахадон преми. Фыссæг æй сбаста алы дæсныйæдты минæвæрттимæ.
Цард у цыбыр, аивад та æнусон. Ахæм ныхæстæй æрфыссæн ис Гуыдиаты Гермæны сфæлдыстадон цард. Цæгат Кавказы кинохроникæйы студийы 30 азы куыстмæ бацæттæ кодта 100 сюжетæй фылдæр киножурнал «Северный Кавказ»-æн. Стæй ма систа 20 документалон кинолентæйы. Æгæрон курдиаты фæрцы стыр æвæрæн бахаста Цæгат Ирыстоны культурæмæ. Уымæн æмæ кино иста йе мдугонтæн, стæй фидæны фæлтæртæн дæр.
