Федтой, хæрæндæтты инфтонггæрзтæ, хойраджы продукттæ куыд дарынц, стæй хæринæгтæ фаг тæвд сты æви нæ, уый
Адæмон фронты эксперттæ сбæлвырд кодтой, Горæтгæрон районы скъолаты сывæллæтты тæвд хæринагæй куыд æххæст кæнынц, уыцы хъуыддаг. Федтой, хæрæндæтты инфтонггæрзтæ, хойраджы продукттæ куыд дарынц, стæй хæринæгтæ фаг тæвд сты æви нæ, уый. Мониторингы хатдзæгты тыххæй бæстон радзурдзæн Хъайтмазты Дзерассæ.
34-æм скъолайы Поселок Заводскойы иумæйаг меню арæзт уыд, сывæллæтты æмæ сæ ныййарджыты фæндонтæ хынцгæйæ. Гречкæ котлетимæ, пюре, тефтелитæ – уыдон сты, ахуыргæнæндоны кæй цæттæ кæнынц, уыцы хæринæгты чысыл хай. Десертæн сывæллæттæн дæттынц дыргътæ – фæткъуытæ, кæрдотæ, мандаринтæ, банантæ.
Адæмон фронты эксперттæ разыйæ баззадысты, цы федтой, уымæй. Сывæллæттæ цæмæй хæрзхъæд хъарм хæринагæй æххæст уой, уымæн скъолайы ис хъæугæ кусæнгæрзтæ, хæрæндоны у сыгъдæг, документацийы дæр ницавæр къуылымпыдзинæдтæ ис.
Ногиры фыццæгæм скъола æрæджы бындуронæй сцалцæг кодтой. Ивддзинæдтæ фæзындысты хæрæндоныл дæр. Баххæст æй кодтой нырыккон кусæнгæрзтæй. Ацы скъолайы дæр рацион сарæзтой сывæллæтты фæндонтæ хынцгæйæ. Менюйæ айстой, ахуырдзаутæ-иу æнæвналдæй кæй ныууагъдтой, уыцы хæринæгтæ. Хойрæгты хæрзхъæддзинадæн аргъ скæнын у ныййарджыты бон дæр. Раздæр хъаст кодтой, хæринаг уазал кæй вæййы. Ныр уыцы фарста лыггонд æрцыд.
Уæвгæ, фиппаинæгтæ уæддæр ис. Ифтонггæрзты иу хай къуылымпытимæ кусы. Рæстæгæй-рæстæгмæ фехæлы.
Мониторингы хатдзæгтæ æрвыст æрцæудзысты профилон ведомствæтæм. Ахæм мадзæлттæ адæмон фронт æххæст кæндзæн дарддæр дæр.
