Бæлвырд кæнынц, бындурон цалцæггæнæн куыстытæ куыд æххæстгонд цæуынц, уый
Адæмон фронты минæвæрттæ аразынц скъолаты мониторинг. Бæлвырд кæнынц, бындурон цалцæггæнæн куыстытæ куыд æххæстгонд цæуынц, уый. Ацы хатт æхсæнадон архайджытæ бабæрæг кодтой Æрæфы район – Советское æмæ Цыколайы 3-æм скъола. Цавæр фиппаинæгтæ рабæрæг кодтой, уый тыххæй радзурдзæн Хъайтмазты Дзерассæ.
Адæмон фронты минæвæрттæ скъолаты цалцæджы хæрзхъæддзинад бæлвырд кæнынц республикæйы сæргълæууæджы хæслæвæрдмæ гæсгæ. Æрæфы районы Советскоемæ æрцыдысты, объект радтыны æмгъуыд кæй фæцис, куыстытæ та кæронмæ æххæстгонд кæй не рцыдысты, уый фæдыл хъасты фæстæ. Бындурон цалцæг райдыдта фарон федералон программæ «Ахуырады райрæзт»-мæ гæсгæ.
Гæлиты Клим – Адæмон фронты регионалон æххæстгæнæн комитеты разамонæг Республикæ Цæгат Ирыстон-Аланийы: Ацы куыст цæуы, уымæн æмæ республикæйы сæргълæууæг бабар кодта саразын штабтæ. Уырдæм бацыдысты адæмон фронт ыуæнгтæ дæр. уыцы куысты фæдыл рацыдыстæм абон, цæмæй фенæм скъолатæ. Куыстытæ скодтой, фæлæ уæддæр цыдæр фиппаинæгтæ ис. Æркастыстæм. Цыдæриддæр сбæрæг кодтам, цы фарстатæ æхгæд не рцыдысты, уыдоныл фыстæгтæ фысдзыстæм бындурон цалцæджы управлени, цæмæй сæ тагъд рæстæджы сраст кæной, уый тыххæй.
Райдзаст кабинеттæ, ног хæрæндон нырыккон кусæнгæрзтимæ. Скъолайы цур территори та нырма аивгонд нæу. Бæстыхайы разуынд ахорынмæ кусджытæ нæма бавнæлдтой. Скъолайы кæрт æхсæнадон территорийæ хицæн кæнынæн ног быру проектмæ хаст не рцыд – ахуыргæнæндоны кусджытæ сæхæдæг æхгæнынц зыхъхъыртæ, цæмæй территоримæ фос ма бахизой.
Цыколайы 3-æм скъолайы дæр бындурон цалцæг фарон райдыдта. Федералон программæмæ гæсгæ æххæстæй баивтой коммуникацитæ, сног кодтой разуынд, бæстыхайы сæр, сæвæрдтой ног рудзгуытæ. Куыстытæ цæуынц районы ахуырады управлениимæ æмархайдгæнгæйæ. Адæмон фронты минæвæрттæ се ргом аздæхтой, къæвдадоны цыхцырæг раст æвæрд кæй нæу, уымæ. Ис пандусы сæрмæ. Аразджытæ зæрдæ бавæрдтой, хæстæгдæр рæстæг æй кæй сраст кæндзысты.
Райдзаст актон зал дæр раппæлинаг у. Районы ахуырады управленийы хицауы хæстæ æххæстгæнæг Хъæбæлоты Залим куыд радзырдта, афтæмæй программæмæ гæсгæ кълæстæ баххæст кодтой хъæугæ кусæнгæрзтæй æмæ хъæддзауматæй. Хи фæрæзтæй та администраци балхæдта хæрæндонæн ифтонггæрзтæ.
Ахуырадон процесс скъолаты фæнд кæнынц райдайын ацы ахуырадон азы фæстаг хайы.
