Фæсивæд сæхи бацæттæ кодтой зæрдиагæй, иттæг хорз сахуыр кодтой конституци æмæ федералон закъонывæрынад
Фæсивæды барадон культурæ фæбæрзонддæр кæнын æмæ сæм æвзарæн системæмæ цымыдисдзинад сæвзæрын кæнын. Мæскуыйы фæци кæронбæттæн къæпхæн. Федералон конкурсы финалы ацы аз нæ республикæйæ архайдтой 3 адæймаджы. Фæсивæд сæхи бацæттæ кодтой зæрдиагæй, иттæг хорз сахуыр кодтой конституци æмæ федералон закъонывæрынад. Уæлахиздзауты æмæ призерты тыххæй радзурдзæн Касаты Наирæ.
Физикон-математикон лицейы ахуырдзау Георгий Миронов æнтыстджынæй ахуыр кæны бæлвырд наукæтæ, æмæ æрмæст уый нæ. Апрелы райдиан æвзарæн барты фарстаты фæдыл олимпиадæйы уæлахиздзауы диплом Георгий райста центрон æвзарæн къамисы сæрдар Эллæ Памфиловайы къухтæй.
Олимпиадæйы æппæты уæлдæр баллтæ уыдысты 10. Георгий сæ сæмбырд кодта се ппæт дæр. Фæлæ æрыгон адæймаг йæ фидæн сфæнд кодта барадон наукæтимæ сбæдтын, уыимæ, бæлвырд наукæтимæ нæ.
Ацы аз олмимпиадæйы архайдтой 12 мин хистæркъласоны бæстæйы 85 регионæй. Мадзал арæзт æрцæуы Уæрæсейы центрон æвзарæн къамисы хъæппæрисæй. Йæ нысан у, фæсивæды барадон культурæ фæбæрзонддæр кæнын, стæй сæм æвзæрстыты системæмæ цымыдисдзинад сæвзæрын кæнын.
Олимпиадæйы кæронбæттæн къæпхæн цыди Мæскуыйы. 5-æм скъолайы рауагъдон Моргуаты Азæмæт дзы сси дыккæгæм къæпхæны дипломы аккаг. Лæппу афтæ разæнгардæй архайдта, æмæ равзæрста йæ фидæны дæсныйад.
Георгий Миронов æмæ Моргуаты Азæмæтимæ олимпиадæйы республикæйы кад хъахъхъæдта Дзæуджыхъæуы 11-æм скъолайы ахуырдзау Гаглойты Аланæ дæр. Афтæмæй ацы фæсивæд, сæ ном базонын кодтой, арæхстджынæй, æмæ ног æнтыстытæм цæттæйæ.
