Ныридæгæн сæм ахуырдзаутæ сæхи активонæй цæттæ кæнынц
Æрхæццæ кæны иумæйаг паддзахадон фæлварæнтæ дæттыны рæстæг. Скъоладзауты сæйраг фæлварæнтæ райдайынц 26-æм майы, æмæ ахæссынц 20-æм июньмæ. Ныридæгæн сæм ахуырдзаутæ сæхи активонæй цæттæ кæнынц. Цæгат Ирыстоны арæхдæр æвзарынц истори æмæ æхсæнадзонынад, фæлæ фæстаг рæстæг скъоладзауты хсæн апарахат сты техникон предметтæ дæр. Уыдон та сты физикæ æмæ математикæ профилон æмвæзадыл. Паддзахадон аттестацимæ скъоладзаутæ сæхи куыд цæттæ кæнынц, уый тыххæй радзурдзæн Тъехты Элинæ.
Архонкæйы фыццæгæм скъолайы ахуырдзау Марина Холодионова 7-æм къласы йæхицæн сбæрæг кодта, тæлмацгæнæг кæй суыдзæн, уый. Чызг равзæрста корейаг æвзаг. Сæ культурæ æмæ музыкæ йæм тынг рæсугъд фæкастысты. Æмæ уæдæй нырмæ бæстон ахуыр кæнын райдыдта уыцы взаг. Йæ ныййарджытæ дæр тæлмацгæнæджы дæсныйадæй разы сты.
Маринæйы æмкъласон Цырыхаты Самирæйы дæр бафæндыд фæсарæйнаг æвзæгтæ базонын. Равзæрста туркаг æвзаг. 9-æм къласæй нырмæ йæхицæн æргом кæны туркаг æвзаджы, культурæйы æмæ традициты сусæгдзинæдтæ. Уæдæ скъолайы фæстæ та фæнд кæны йæ ахуыр фæсарæнты адарддæр кæнын. Куыд зæгъы, афтæмæй йæм фаг зонындзинæдтæ ис, цæмæй сыгъдæг дзура уыцы взагыл, уый тыххæй.
Ацы аз иумæйаг паддзахадон фæлварæнты архайдзысты нæ республикæйы 3 мины æмæ 8 сæдæ скъоладзауæй фылдæр. Алы ахуырдзхау дæр алыхуызон профилон предметтæ кæй равзæрста, уый нæ хынцгæйæ, иу сæ кæны, сæ бæрæггæнæнтыл кæй тыхсынц, уый. Психологон – педагогон æмæ социалон æххуысы медицинон центр «Доверие»-йы специалисттæ куыд зæгъынц, афтæмæй уыцы тыхст цæмæй айсай, уый тыххæй хъæуы сæрмагонд психологон фæлтæрæнтæ кæнын.
Иумæйаг пддзахадон фæлварæнтæм бацæттæ кæнынмæ æххуыс кæны республикæйы ахуырады æмæ наукæйы министрад дæр. Скъоладзаутæ урокты фæстæ фæкусынц сæ ахуыргæнджытимæ. Февзарынц, фæлварæны цы фæрстытæ вæййы, ахæмтæ.
Уымæй уæлдай ма республикæйы сæргълæууæджы уынаффæмæ гæсгæ фарон байгом онлайн – скъола. Ахæм ахуыры хуызы фæрцы ахуырдзаутæн фадат ис ахуыргæнджыты æмæ наукон кусджыты уроктæм хъусынæн. Уыдон та сын, кæй зæгъын æй хъæуы, баххуыс кæндзысты фæлварæнты рæстæг.
